Azərbaycan Respublikası Prezidenti yanında Bilik Fondu və AMEA Azərbaycan Tarixi Muzeyinin birgə keçirdiyi uşaq rəsmləri müsabiqəsi belə adlanır. Muzeydə təşkil edilmiş ekspozisiyada Azərbaycan Dövlət Uşaq Filarmoniyası və Hövsan Mədəniyyət Evində gənc rəssam Gilan Əzizxanlının rəhbərliyi ilə fəaliyyət göstərən uşaq rəsm dərnəyi üzvlərinin çəkdikləri 67 rəsm nümayiş olunur.

Açılış mərasimində Milli Azərbaycan Tarixi Muzeyinin direktoru, Əməkdar elm xadimi, akademik Nailə Vəlixanlı balaca rəssamları ilkin sənət hesabatı münasibətilə təbrik edib və onlara daha böyük uğurlar arzulayıb. Bilik Fondunun icraçı direktoru Oktay Səmədov rəhbərlik etdiyi qurumun təşəbbüsü ilə vaxtaşırı uşaqlar və yeniyetmələr arasında yaradıcılıq müsabiqələrinin və sərgilərin keçirildiyini bildirib. O, bundan sonra da məktəblilərin intellektual və yaradıcılıq baxımdan inkişafı üçün hərtərəfli şərait yaradılacağını deyib.

Azərbaycan Dövlət Uşaq Filarmoniyasının direktoru, Əməkdar incəsənət xadimi Dilarə Əliyeva, Əməkdar incəsənət xadimi, sənətşünaslıq üzrə fəlsəfə doktoru Ziyadxan Əliyev, rəssamlardan Vaqif Ucatay, İlqar Əkbərov, Minə Məmmədova və Tərlan Eyvazov, “Dədə Qorqud” Fondunun prezidenti Eldar İsmayılov yeni nəslin estetik tərbiyəsində, təsviri incəsənətin inkişafında belə sərgilərin böyük rolu olduğunu söyləyiblər.

Sonda balaca rəssamlara təşəkkürnamələr və hədiyyələr təqdim olunub. Sərgi ilin sonunadək davam edəcək.

Akif ƏHMƏDGİL