U. Şekspirin  “Hamlet” faciəsi  Azərbaycanda   dəfələrlə tamaşaya qoyulub.  Bu gün isə Azərbaycan Dövlət Akademik Milli Dram Teatrının səhnəsində Londonun  dünya şöhrətli “Qlobus” teatrının “Hamlet” tamaşası nümayiş olunacaq. Qeyd edək ki, bu teatrın repertuarı  ancaq Şekspirin əsərlərindən ibarətdir. Tamaşa Azərbaycan Respublikası Mədəniyyət və Turizm Nazirliyinin və Böyük Britaniya səfirliyinin  dəstəyi ilə Bakıya  gətirilmişdir. Bu barədə Mədəniyyət və Turizm Nazirliyinin mətbuat xidməti məlumat yaymışdır.

Şekspirin anadan olmasının 450-ci və ölümünün 400-cü ildönümünü qeyd edən “Qlobus” Teatrı 23 aprel 2014-cü il tarixindən 23 aprel 2016-cı il tarixədək davam edəcək möhtəşəm dünya turnesinə çıxmışdır. Bu, tamamilə misilsiz teatr səfərinin məqsədi  “Hamlet” tamaşasını iki il müddətində dünyanın hər bir ölkəsində nümayiş etdirməkdən ibarətdir. On altı nəfərdən ibarət truppanın  dünyanın bütün qitələrinə  səyahət edərək unikal məkanlarda və əsrarəngiz teatr səhnələrində çıxışı  nəzərdə tutulub.

“Qlobus” teatrının bədii rəhbəri və “Hamlet”tamaşasının rejissoru Dominik Dromgul bildirib ki, “Globe to Globe Hamlet” layihəsi “Hamlet” tamaşasının müxtəlif məkanlarda və böyük tamaşaçı auditoriyası qarşısında nümayiş olunması məqsədilə yaradılıb.

 Turnenin əsas qayəsi ondan ibarətdir ki, Şekspir yer üzündə insanların harada yaşamasından asılı olmayaraq, hər kəsi əyləndirə və hər kəslə danışa bilər və heç bir ölkə və heç bir xalq “Hamlet”in canlı tamaşasından imtina etməz. Hazırda səyahətin yarıdan çox hissəsi  tamamlanıb və “Hamlet” tamaşası Amerika, Avropa və Afrika daxil olmaqla, artıq 100-dən çox ölkədə yüz mindən artıq tamaşaçı kütləsi üçün nümayiş etdirilib.

Tamaşa ingilis dilində oynanılacaq və Azərbaycan dilində  titrlərlə müşayiət ediləcək.

M. MÜKƏRRƏMOĞLU,
“Xalq qəzeti”