Azərbaycanda nəşr olunan bədii-poliqrafik baxımdan  əhəmiyyətli kitablar dünyanın məşhur beynəlxalq kitab  sərgilərində mütəmadi qaydada nümayiş etdirilməkdədir.

Azərbaycanda kitab nəşri və poliqrafiyanın daha da inkişaf etdirilməsi, nəşr olunmuş gərəkli çap məhsullarına kütləvi marağın təmin edilməsi, xarici ölkələrin nəşriyyatları ilə əlaqələrin qurulması, kitab mübadiləsi, ölkə nəşriyyatlarının satış və təbliğat imkanlarının genişlənməsi Azərbaycanda da beynəlxalq kitab sərgi– yarmarkasının uğurlu fəaliyyət göstərməsinə səbəb olmuşdur.

Bu məqsədlə 2009, 2011 və 2013-cü illərdə təşkil olunmuş Bakı Beynəlxalq Kitab Sərgi-Yarmarkası ölkəmizdə, eyni zamanda, regionda rəğbət qazanmış, kitab nəşri və yayımı prosesində yeni mərhələnin əsasını qoymuşdur.

Fəaliyyətin davamı olaraq müəyyən edilmiş qaydaya əsasən, Azərbaycan Respublikası Mədəniyyət və Turizm Nazirliyinin təşkilatçılığı ilə 16-18 sentyabr 2015-ci il tarixində Bakı İdman Sarayında (keçmiş Bakı Əl Oyunları Sarayı) IV Bakı Beynəlxalq Kitab Sərgi-Yarmarkası keçiriləcək. Məlumatı Milli Kitabxananın  rəsmi saytı yaymışdır.

Bakı Şəhər Mədəniyyət və Turizm İdarəsinin şəbəkəsinə daxil olan Mərkəzləşdirilmiş Kitabxana Sistemləri və M.Ə.Sabir adına şəhər kütləvi kitabxanası tərəfindən də əhalinin asudə vaxtını səmərəli keçirməsi, cəmiyyətdə mütaliənin təbliği, mütaliə vərdişlərinin inkişaf etdirilməsi, kitabxanalara ictimai marağın artırılması məqsədilə IV Bakı Beynəlxalq Kitab Sərgi-Yarmarkası çərçivəsində müxtəlif sərgilər təşkil ediləcək.

M. MÜKƏRRƏMOĞLU,
“Xalq  qəzeti”