Gənc rəssam Çingiz Mehbaliyevin Serbiyanın paytaxtı Belqrad şəhərində “İkinci addım” adlı fərdi rəsm sərgisi açılıb. Diasporla Iş üzrə Dövlət Komitəsindən verilən məlumatda bildirilir ki, məşhur serb  rəssamı və yazıçısı Djura Yakşiçin ev muzeyində keçirilən sərgidə Çingiz Mehbaliyevin realizm, sürrealizm üslubunda çəkilən və müxtəlif mövzuları əhatə edən rəngkarlıq, qrafika əsərləri nümayiş etdirilir.

Dörd gün davam edəcək sərgidə təqdim olunan bəzi rəsmlər ilk dəfədir ki, açıq sərgi salonunda nümayiş etdirilir. “Hacı Zeynalabdin Tağıyev şollar su kəmərinin çəkilişində”, “Qarabağdan buket”, “Uzaqlaşan gələcək”, “Uçan xalça” belə rəsmlərdəndir.

Sərginin açılış mərasimində Serbiyadakı Azərbaycan Mədəniyyət Evinin rəhbəri Zərifə Əlizadə, Azərbaycanın Serbiyadakı səfirliyinin nümayəndələri, Serbiyadakı Azərbaycan diasporunun təmsilçiləri, Serbiyanın ictimai xadimləri, iş adamları və incəsənət xadimləri iştirak ediblər.

Xatırladaq ki, bu sərgi azərbaycanlı rəssam Ç.Mehbaliyevin Avropada keçirilən ilk fərdi rəsm sərgisi deyil. Rəssamın bundan öncəki rəsm sərgisi 2013-cü ilin iyul ayında Macarıstanın paytaxtı Budapeşt şəhərində təşkil olunub.

Samirə ƏLİYEVA,
“Xalq qəzeti”