I Avropa Oyunlarını izləmək üçün şəhərimizdə qonaq olan xarici ölkə nümayəndələri Azərbaycan Dövlət Gənc Tamaşaçılar Teatrında olmuş və teatrda xüsusi olaraq turistlər və qonaqlar üçün hazırlanmış  M.F.Axundzadənin “Müsyö Jordan və Dərviş Məstəli şah” və Ə.Haqverdiyevin “Pəri Cadu”  tamaşalarını seyr ediblər.

ABŞ-dan, Meksikadan, İtaliyadan, Türkiyədən, Çindən və Pakistandan gəlmiş turistlər tamaşadan sonra təəssüratlarını bölüşərək birinci  Avropa Oyunlarının yüksək səviyyədə keçirilməsi, şəhərimizin füsunkar gözəlliyi, insanların istiqanlı olması haqqında xoş sözlər söyləyiblər.

Qonaqlar tamaşalardakı milli koloritə, aktyorların peşəkar ifasına, səslənən canlı muğam parçalarına heyran olduqlarını xüsusi qeyd ediblər.

İtaliyalı jurnalist və turistlər teatrın direktoru, Əməkdar artist Mübariz Həmidovla söhbətlərində ölkəmiz haqqında təəssüratlarını bölüşərək teatr binasının dizaynının yüksək zövqlə qurulduğunu da vurğulayıblar: “Şəhərinizin milli və müasir görkəmi bir çox Avropa ölkələrini geridə qoyub. Teatrınız, seyr etdiyimiz tamaşalar isə yalnız dünyanın ən aparıcı teatrları ilə müqayisə oluna bilər. Biz Bakıda olduğumuza və belə mədəniyyət ocağını ziyarət etdiyimizə görə özümüzü xoşbəxt sayırıq”.

Məlumat üçün bildiririk ki, birinci  Avropa Oyunları ilə bağlı əcnəbi qonaqlar üçün nəzərdə tutulmuş tamaşaların nümayişi iyunun 29-dək davam edəcək.

M.MÜKƏRRƏMOĞLU,
“Xalq qəzeti”