Azərbaycanın Özbəkistandakı səfirliyinin və onun nəzdindəki Heydər Əliyev adına Azərbaycan Mədəniyyət Mərkəzinin (AMM) təşəbbüsü ilə Milli Qurtuluş Günü münasibətilə AMM-nin ulu öndərin adını daşıyan muzeyində “Heydər Əliyev və Şərq” mövzusunda sərgi keçirilib.

AMM-nin dərnək və kurslarında məşğul olan şagirdlər və mərkəzin əməkdaşları sərginin açılışında iştirak ediblər.

AMM-nin əməkdaşı Kifayət Pirməmmədova uşaqlara Heydər Əliyevin həyat və fəaliyyəti haqqında ətraflı məlumat verib, Milli Qurtuluş Günü haqqında danışıb, ulu öndərin Şərq siyasəti haqqında söhbət açıb.

Heydər Əliyevin 1970-1980-ci illərdə ölkədə gördüyü işlər və müstəqillik dövründə Azərbaycan dövlətinin və dövlətçiliyinin formalaşmasında və inkişafında, ölkənin suverenliyi, ərazi bütövlüyü, dünya birliyinə inteqrasiyası, neft və digər uzunmüddətli layihələrin hazırlanmasında əvəzolunmaz xidmətləri haqqında söhbət açılıb. 

Bildirilib ki, ulu öndər Azərbaycan diasporuna həmişə yüksək diqqət və qayğı göstərib. Ümummilli liderin bu siyasətini Prezident İlham Əliyev uğurla davam etdirir. Sərginin açılışında son illər Azərbaycanda aparılan genişmiqyaslı quruculuq işləri haqqında da məlumat verilib.

Qulu KƏNGƏRLİ
AZƏRTAC-ın xüsusi müxbiri

Daşkənd