Azərbaycan öz müstəqilliyi tarixində ən böyük beynəlxalq tədbirə – ilk Avropa Oyunlarına ev sahibliyi edəcək. Ölkəmizin turizm imkanlarının təqdim olunmasında bu beynəlxaq tədbirin əhəmiyyətli rolu olacağı şübhəsizdir. Bu yarışlara 50 ölkədən 6000-dən artıq idmançı qatılacaq. Tədbirlərdə iştirak edəcək turistlərin də sayının kifayət qədər olacağı gözlənilir.

Artıq beynəlxalq aləmdə turizm ölkəsi kimi tanınmağa başlayan Azərbaycan birinci Avropa Oyunları dövründə turistlərin daha çox səfər etdiyi məkana çevriləcək.

Hətta Birləşmiş Ərəb Əmirliklərində ərəb dilində yüksək tirajla dərc olunan nüfuzlu “Əl-İttihad” qəzeti Bakıda keçiriləcək birinci Avropa Oyunlarının yay turizminin inkişafına təkan verəcəyini yazıb. Yazıda jurnalist Nəsrin Dərzi bu il Bakıda təşkil olunacaq birinci Avropa Oyunlarını böyük idman hadisəsi olmaqla bərabər, həm də turizmin təbliğində və inkişafında yeni mərhələ kimi qiymətləndirib. Qeyd olunub ki, Azərbaycan coğrafi mövqeyi, təbiəti, tarixi və müasir inkişaf potensialı baxımından hazırda postsovet məkanında ən çox üz tutulan turizm ölkəsidir. Bu mənada yay mövsümünə təsadüf edən ilk Avropa Oyunları təkcə idman həvəskarlarının yox, eyni zamanda turistlərin də maraq dairəsində olacaq.

 I Avropa Oyunları ilə bağlı xarici ölkələrdə keçirilən təqdimat mərasimlərində Azərbaycan haqqında, onun zəngin turizm potensialı barədə geniş məlumatlar verilir. Bu da Azərbaycana gəlmək istəyən turistlərin say artımına güclü təsir göstərir.

Bu beynəlxalq tədbirin keçiriləcəyi ərəfədə turistlər üçün şəraitin yaradılması diqqət mərkəzindədir.Mədəniyyət və Turizm Nazirliyi I Avropa Oyunlarının keçiriləcəyi müddət ərzində tabeliyində olan muzey və tarixi abidələrin iş qrafikini uzatmağı nəzərdə tutur. Bunu nazirliyin İnformasiya və ictimaiyyətlə əlaqələr şöbəsinin müdiri Vüqar Şıxməmmədov deyib.

Onun sözlərinə görə, Bakı şəhərində fəaliyyət göstərən teatrların iyun ayı üçün repertuarı artıq hazırlanaraq təsdiq olunub. Bir neçə teatrda bəzi tamaşaların rus və ingilis dillərində nümayiş olunması və ya onların tərcümə olunaraq təqdim edilməsi planlaşdırılır.

Bununla yanaşı, nazirliyin nəşri olan və hər ay Bakıda fəaliyyət göstərən mehmanxanalara paylanılan “Baku Guide” kataloqunun həmin dövr üçün xüsusi buraxılışı dərc ediləcək. Bu nəşrin qonaqların yerləşəcəyi mehmanxanada, tədbirlərin keçiriləcəyi obyektlərdə yayımı nəzərdə tutulur.

Həm Heydər Əliyev Beynəlxalq Hava Limanında, həm Mingəçevirə yaxın olan Gəncə Hava Limanında, həm də Bakının mərkəzində bir neçə yerdə informasiya köşkləri fəaliyyət göstərəcək. Bu köşklər qonaqlara Bakı və Azərbaycan haqqında dolğun məlumatlar çatdırmağa yardım edəcək.

Bütün bu tədbirlər ölkəmizə gələcək idmançıların, iştirakçıların Azərbaycandan xoş təəssüratla ayrılmasını təmin etmək üçün həyata keçirilir.

M.MÜKƏRRƏMOĞLU,
“Xalq qəzeti”