Rəşid Behbudov adına Azərbaycan Dövlət Mahnı Teatrında Şamaxı İncəsənət Təhsili Mərkəzinin şagirdləri ulu öndər Heydər Əliyevin anadan olmasının 92-ci ildönümünə həsr etdikləri konsert proqramı ilə çıxış etmişlər.

Şamaxı Rayon İcra Hakimiyyəti başçısının müavini Gülnisə Ələkbərova ümummilli lider Heydər Əliyevin Azərbaycan musiqisinə, elminə və təhsilinə göstərdiyi qayğıdan danışmış, nəsillərə örnək olacaq zəngin dövlətçilik təcrübəsindən söhbət açmışdır.

Bakı şəhər Tofiq Quliyev adına 12 saylı on bir illik musiqi məktəbinin direktoru Gülnarə Səfərova isə ulu öndərin siyasi kursunun layiqli davamçısı Prezident İlham Əliyevin bu gün mədəniyyətə, incəsənətə, idmana və eləcə də gələcəyimiz olan yaradıcı uşaqlara diqqətini xüsusi vurğulamışdır.

Sonra səhnə şagirdlərin ixtiyarına verilmişdir.

Konserti  incəsənət mərkəzinin  xalq çalğı alətləri orkestrinin şagirdləri açaraq rəngarəng musiqi nümunələri ilə çıxış etmişlər. Konsert proqramına xalq mahnıları, muğamlar, milli rəqslər, Üzeyir Hacıbəylinin, Tofiq Quliyevin, Əziz Əzizovun, Süleyman Ələsgərovun, Azər Dadaşovun əsərləri ilə yanaşı, bir sıra Avropa və rus bəstəkarlarının da əsərləri daxil edilmişdir.

“Nağaraçalanlar ansamblı”nın  çıxışı hamıda xoş ovqat yaratmışdır.

Sonda Şamaxı İncəsənət Təhsili Mərkəzinin direktoru Namiq Rzazadə çıxış edərək bütün iştirakçılara uğurlar arzulamış, konsertdə iştirak edən şagirdlərin və onların yetişməsində rolu olan bütün müəllimlərin əməyini xüsusilə vurğulamışdır.

İlqar MUSAOĞLU,
“Xalq qəzeti”nin bölgə müxbiri