Xəbər verdiyimiz kimi, aprelin 17-18-də Koreya Respublikasının Azərbaycan Respublikasındakı səfirliyi və SEBA (Seul-Bakı) Azərbaycan-Koreya Mədəniyyət Mübadiləsi Assosiasiyasının təşkilatçılığı ilə Füzuli rayonunda məcburi köçkünlər üçün “Sabaha sağlam ruhla” adlı yeni layihə həyata keçirilib.

AZƏRTAC xəbər verir ki, layihəyə Qaçqınların və Məcburi Köçkünlərin İşləri üzrə Dövlət Komitəsi və Füzuli Rayon İcra Hakimiyyəti dəstək verib.

Layihənin Füzuli Müalicə-Diaqnostika Mərkəzində keçirilən açılış mərasimində rayon icra hakimiyyətinin başçısı Alı Alıyev, Koreya Respublikasının Azərbaycandakı səfiri Çoi Suk İn və SEBA Assosiasiyasının sədri xanım Ruhəngiz Heydərova çıxış edərək layihənin vacibliyini və böyük əhəmiyyət kəsb etdiyini vurğulayıblar.

Layihə çərçivəsində keçirilən ilk tədbirdə Kyung Hee Universitetinin Bakıda - SEBA Assosiasiyasının nəzdində fəaliyyət göstərən Koreya Şərq Təbabəti Klinikasının əməkdaşları, koreyalı həkim-professorlar və fizioterapevt tərəfindən 260 məcburi köçkünə könüllü tibbi xidmət göstərilib. İki gün ərzində osteoxondroz, iflic, artrit, revmatizm, əzələ ağrıları və s. belə xəstəliklərdən əziyyət çəkən məcburi köçkünlərin müayinəsi ilə yanaşı, hər bir pasiyentə içərisində Koreya Respublikasında istehsal edilən 13 növ dərman olan bağlamalar paylanıb.

Səfər çərçivəsində Koreya Respublikasının səfiri Çoi Suk İn və SEBA Assosiasiyasının sədri xanım Ruhəngiz Heydərova Füzuli Rayon İcra Hakimiyyətinin başçısı Alı Alıyevlə görüşüb və məcburi köçkünlərin məskunlaşdıqları “Zobucuq 2" qəsəbəsi ilə tanış olub, bir ailəyə baş çəkiblər. Səfirlik tərəfindən həmin ailəyə elektrik ətçəkən maşın, SEBA Assosiasiyası tərəfindən isə paltaryuyan maşın hədiyyə olunub.

Layihə çərçivəsində Horadiz şəhər 3 nömrəli tam orta məktəbin III-V siniflərində təhsil alan 60 şagirdin iştirak etdiyi “Sehrli nağıl” rəsm müsabiqəsi keçirilib. Şagirdlər Azərbaycan nağılı “Göyçək Fatma” və Koreya nağılı “Şim Çonqun hekayəsi” haqqında təsəvvürlərini rəsmlərlə ifadə ediblər. Müsabiqə iştirakçıları səfirlik və Koreya Respublikasının Azərbaycanda fəaliyyət göstərən “Halla” Korporasiyası tərəfindən məktəbli çantaları və dəftərxana ləvazimatları ilə mükafatlandırılıblar. SEBA Assosiasiyası da şagirdlərə müxtəlif həvəsləndirici hədiyyələr təqdim edib.

Sonra təşkilatçılar Füzuli rayonunun Əhmədbəyli kəndində yerləşən Mirmehdi Xəqani adına musiqi təmayüllü internat tipli gimnaziyada təhsil alan 311 uşaqla görüşüb, onlara hədiyyələr və şirniyyatlar paylayıblar.

Layihənin sonunda Horadiz şəhərinin Muğam Mərkəzində Koreya Respublikasının səfiri Çoi Suk İn və Füzuli Rayon İcra Hakimiyyətinin başçısı Alı Alıyev çıxış edərək genişmiqyaslı bu mühüm layihənin yekunlarını yüksək qiymətləndiriblər. Layihənin çoxtərəfli olduğu və uğurlu keçirildiyi xüsusi qeyd edilib.

Tədbirə qatılan 300-dək Fizuli sakininə 2012-ci ildə rejissor Lee Yong-ju tərəfindən çəkilən və Koreya Respublikasında böyük uğur, eyni zamanda, dünyada populyarlıq qazanmış “Memarlıq-101" filmi nümayiş olunub.

“Sabaha sağlam ruhla” layihəsi Azərbaycan ilə Koreya Respublikası arasında dostluq əlaqələrinin qarşılıqlı anlaşma və inam əsasında daha da möhkəmləndirilməsi məqsədi daşıyır. Layihənin bu il Azərbaycanın daha iki rayonunda da həyata keçirilməsi nəzərdə tutulur.