Mərakeş Milli Kitabxanasının direktoru, professor Driss Khrouz Azərbaycan Milli Kitabxanasında olmuşdur. Görüşdə Mərakeş Krallığının Azərbaycandakı səfiri Həsən Hami də iştirak etmişdir. Milli Kitabxananın direktoru, professor Kərim Tahirovla söhbət zamanı professor Driss Khrouz Azərbaycana səfərindən məmnunluq duyduğunu söyləmiş, elm, mədəniyyət ocağında görüşmək imkanına şəarit yaratdığı üçün kitabxananın rəhbərliyinə minnətdarlığını bildirmişdir.

 Qonağa Azərbaycan Milli Kitabxanası haqqında ətraflı məlumat verən Kərim Tahirov Milli Kitabxananın fəaliyyətindən, nailiyyətlərindən, uğurlarından, beynəlxalq əlaqələrindən, beynəlxalq təşkilatlara üzvlükdən danışmışdır. Azərbaycan Milli Kitabxanası, AMEA-nın Əlyazmalar İnstitutu və Mərakeş Milli Kitabxanası arasında imzalanacaq üçtərəfli Əməkdaşlıq Memorandumunun beynəlxalq əlaqələrin qurulmasına zəmin yaradacağını, Misir və İordaniyadan sonra ərəb ölkələri arasında Mərakeşin 3-cü ölkə olduğunu vurğulayan K.Tahirov bu Memorandumla çox uğurlu əməkdaşlığa imza qoyulacağını bildirmişdir. Memorandumun şərtlərinə müvafiq olaraq kitab və biblioqrafik resurs mübadiləsinin, təcrübə mübadiləsinin, stajorluq, seminar və konfransların keçirilməsi, kitab sərgilərinin təşkil edilməsinin mümkünlüyünü qeyd etmişdir. Mərakeşə aid Azərbaycan Milli Kitabxanasında çox az ədəbiyyatın mühafizə olunduğunu qeyd edən direktor növbəti tədbirdə zəngin ədəbiyyatdan ibarət sərginin təşkil olunacağına əminliyini bildirmişdir.

Driss Khrouz da cıxış edərək Mərakeş Milli Kitabxanası haqqında qısa məlumat vermiş, MMK-nın da həmçinin yeni texnologiyalardan istifadə etdiyini, fondun yarısının artıq rəqəmsallaşdığını bildirmişdir. MMK-nın bütün nəşrlərdən 4 məcburi nüsxə aldığını qeyd edən D. Khrouz  bir nüsxəsini  Azərbaycana göndərəcəyini qeyd etmişdir. MMK-nın fondunda, həmçinin, əlyazmaların qorunduğunu, 36 mindən artıq əlyazmanın mövcudluğunu söyləmişdir. D, Khrouz öz həmkarını Mərakeş Milli Kitabxanası ilə tanış olmağa dəvət etmişdir.

M.MÜKƏRRƏMOĞLU,
“Xalq qəzeti”