Bu günlərdə AMEA Tarix İnstitutunun növbəti uğurlu layihəsi işıq üzü görüb.  635 səhifəlik, geniş elmi araşdırmalara və mənbə materiallarına söykənən “İrəvan xanlığı” kitabı İtaliyada italyan dilində nəşr olunub.

 Əsər tanınmış tarixçilər tərəfindən italyan dilinə tərcümə olunub və Tarix İnstitutunun əməkdaşları tərəfindən yoxlanıldıqdan sonra çap edilib. Kitabın redaktəsi, kompüter qrafikası, maketinin hazırlanması, çapı, cildlənməsi, yayılması, daşınması, reklam edilməsi, eləcə də ingiliscədən tərcüməsi, redaktə və korrektəsi italiyalı mütəxəssislər tərəfindən həyata keçirilmişdir. Kitabın Milan, Roma, Neapol və digər şəhərlərdə təqdimatının keçirilməsi nəzərdə tutulur.

 Milli Məclisin deputatı, AMEA Tarix İnstitutunun direktoru, professor Yaqub Mahmudov qeyd etdi ki, bu kitab bilavasitə Prezident İlham Əliyevin göstərişi ilə hazırlanmışdır. Dövlət başçımız İrəvan şəhərinin əzəli torpaqlarımızdan biri olduğunu həmişə çıxışlarında vurğulayır və bizim gec-tez öz yurdumuza qayıdacağımızı cəmiyyətimizə xatırladır. Professor Y.Mahmudov bildirdi ki, ümumiyyətlə  “İrəvan xanlığı” kitabının nəşri Azərbaycan tarix elminə böyük töhfədir. Bu gün ermənilərin saysız-hesabsız uydurma iddiaları ilə qarşı-qarşı qaldığımız məqamda faktlara, həqiqətlərə söykənən belə bir əsərin ərsəyə gətirilməsi institumuzun böyük uğurudur.

 İndi isə əsər artıq italyan dilində çap olunub. Bu, İtaliyada fəaliyyət göstərən və daim bizə qarşı öz qərəzli və məkrli fəaliyyəti ilə seçilən erməni lobbisinə tutarlı elmi cavabdır. Düşünürəm ki, italyan dilində nəşr olunan bu kitab həm də əcnəbi dostlarımızın maarifləndirilməsində böyük rol oynayacaqdır.

Anar TURAN,
"Xalq qəzeti”