Azərbaycan Yazıçılar Birliyinin (AYB) “Natəvan” klubunda yazıçı-publisist  Hüseynbala Mirələmovun “Axirətdən gələn zəng” kitabının “İmza günü” keçirilib.

AZƏRTAC xəbər verir ki, bu yaxınlarda “Mütərcim” nəşriyyatında çap olunan kitab AYB-nin “aybKitab” layihəsi çərçivəsində nəşr olunub. Layihənin rəhbəri birliyin mətbuat xidmətinin rəhbəri Xəyal Rzadı. Kitabda yazıçının “Axirətdən gələn zəng” pyesi və iki hekayəsi yer alıb.

Təqdimat mərasimində Azərbaycanda Atatürk Mərkəzinin müdiri, Milli Məclisin mədəniyyət komitəsinin sədri, professor Nizami Cəfərov, AYB-nin sədri, Xalq yazıçısı Anar çıxışlarında Hüseynbala Mirələmovu yeni kitabının işıq üzü görməsi münasibətilə təbrik edib, kitab haqqında  fikirlərini tədbir iştirakçıları ilə bölüşüblər.

Mərasimdə  çıxış edən “Azərbaycan” jurnalının baş redaktoru İntiqam Qasımzadə, filologiya elmləri doktorları Vaqif Yusifli, Himalay Qasımov, yazıçı-publisist Elçin Hüseynbəyli, şairlər Oqtay Rza, Balayar Sadiq, Ənvər Əhməd, Əli Rza Xələfli və başqaları Hüseynbala Mirələmovu əməksevər, işgüzar, öz üzərində fəal çalışan insan, yaradıcılığında həyat həqiqətlərinə sadiq qalan yazıçı kimi dəyərləndiriblər.

Sonda Hüseynbala Mirələmov tədbirin təşkilatçılarına və iştirakçılarına minnətdarlığını bildirib, imzası ilə kitablarını oxuculara təqdim edib.