Mədəniyyət və Turizm Nazirliyində “Azərbaycanda Qafqaz almanları muzeyi” konsepsiyası layihəsinin müzakirəsi keçirilib.Bu barədə,  nazirliyin rəsmi saytı məlumat yayıb.

Müzakirədə mədəniyyət və turizm naziri Əbülfəs Qarayey, nazir müavini Sevda Məmmədəliyeva, nazirliyin məsul işçiləri, Almaniyanın ölkəmizdəki fövqəladə və səlahiyyətli səfiri Haydrun Tempel və layihəyə aidiyyəti olan qurumların nümayəndələri iştirak ediblər.

“Cənubi Qafqazda Yerli Özünüidarəetmə” proqramının Azərbaycan üzrə rəhbəri Katarina Lampe layihənin əhəmiyyəti barədə danışıb. Qeyd edib ki, bu, Azərbaycanda Qafqaz almanlarının mədəniyyətini və yaşam tərzini nümayiş etdirən ilk muzey olacaq. Layihə Azərbaycanla Almaniya arasında mədəni-humanitar əməkdaşlığa töhfə verəcək.

“EuroKaukAsia” elmi-mədəni cəmiyyətinin sədri, professor Eva-Maria Aux (Auch) “Azərbaycanda Qafqaz almanları muzeyi” layihəsini təqdim edib. Bildirib ki, layihə çərçivəsində Göygöl şəhərində (keçmiş Helenendorf qəsəbəsi) yaşamış sonuncu alman kolonisti Viktor Klaynın evi muzeyə çevriləcək. Muzeyi yaratmaqda əsas məqsəd XIX əsrin əvvəllərindən etibarən Azərbaycanda məskunlaşmış və çoxmillətli mühitdə yaşamış almanların tarixini və mədəniyyətini nümayiş etdirmək, Azərbaycandakı alman irsini qorumaq və Almaniya-Azərbaycan münasibətlərini daha da inkişaf etdirməkdir.

Müzakirə qarşılıqlı diskussiya şəraitində davam etdirilib.

M.MÜKƏRRƏMOĞLU,
“Xalq qəzeti”