20 Yanvar faciəsinin iyirmi beşinci ildönümü teatr - konsert müəssisələrində, kitabxanalarda , mədəniyyət ocaqlarında da geniş qeyd olunur.

Belə ki, bu münasibətlə  yanvarın 11-də  Azərbaycan Dövlət Akademik Opera və Balet Teatrında Vasif Adıgözəlovun “Natəvan” operası nümayiş olunub. Dünən isə Azərbaycan Dövlət Akademik Milli Dram Teatrında Hüseynbala Mirələmovun “Xəcalət”, yanvarın 20-də isə İlyas Əfəndiyevin “Qarabağnamə” tamaşasının nümayişi nəzərdə tutulur.

Anım tədbirləri çərçivəsində bu gün Azərbaycan Dövlət Akademik Opera və Balet Teatrında daha bir operanın - Firəngiz Əlizadənin “İntizar ” operasının nümayişi reallaşacaq. Azərbaycan Dövlət Filarmoniyasında isə 20 Yanvar faciəsinin iyirmi beşinci ildönümünə həsr olunmuş gecə də keçiriləcək. Tədbirdə Xalq artisti Teymur Göyçayevin rəhbərliyi ilə Q.Qarayev adına Azərbaycan Dövlət Kamera Orkestri və solistlər iştirak edəcəklər.

Yanvarın 18-də isə tamaşaçılar “Yuğ” Dövlət Teatrında Ülviyyə Heydərovanın “Yad. Daş” adlı tamaşasını izləyə biləcəklər. 20 Yanvar günü isə Azərbaycan Dövlət Gənc Tamaşaçılar Teatrı izləyicilərinə Tamara Vəliyevanın “Mənim ağ göyərçinim” adlı tamaşasını təqdim edəcək.

Şuşa Musiqili Dram və İrəvan teatrlarında da 20 Yanvar faciəsinin iyirmi beşinci ildönümünün keçirilməsi ilə əlaqədar toplantılar və tamaşalar təşkil olunacaq.

 M. MÜKƏRRƏMOĞLU,
“Xalq qəzeti”