Bu günlərdə Vaqif Sultanlının “Ölüm yuxusu” (“The Dream of  Death”) adlı kitabı Danimarkada (Helsinge, 2014) ingiliscə nəşr olunmuşdur. Yazıçının eyniadlı povestinin, müxtəlif illərdə qələmə aldığı hekayələrinin daxil edildiyi kitabın redaktoru tanınmış Danimarka yazıçısı və esseisti Annemarie Skjoldundur.

Qeyd edək ki,  bu, Vaqif Sultanlının  ingilisdilli oxuculara təqdim olunan ilk kitabı deyildir. Belə ki, yazıçının roman və hekayələrdən ibarət “İnsan dənizi”, “Ölüm yuxusu”, “Tərs axın” kitabları İngiltərədə və ABŞ-da nəşr olunmuş, habelə onun tərtibatında (Dr.İrəc İsmaeli ilə birlikdə) “Müasir Azərbaycan nəsri” (Modern Azerbaijanian Prose, 2012) və “Müasir Azərbaycan qadın nəsri” (Modern Azerbaijani Women’s Prose, 2014) antologiyaları ABŞ oxucularına təqdim edilmişdir.

Müəllifin bədii yaradıcılığında xüsusi yer tutan, real və şərti-metaforik üslubun qovuşuğunda qələmə alınmış “Ölüm yuxusu” povestində təsvir obyekti kimi seçilən yolun çəkilişi fonunda məzarlığın köçürülməsi problemi cəmiyyət həyatında baş verən ciddi prosseslər kimi canlandırılır. Təsvir olunan hadisələrin xaos kontekstində təqdimi obrazların xarakter cizgilərini, mənəvi dünyasının gizli çalarlarını bütün yönlərilə aşkarlamağa imkan verir. Gərgin, dramatik konflikt fonunda davam edən, qəbiristanlığı uçuran buldozerçinin intihar etməsi ilə tamamlanan povestdə mənəvi-əxlaqi dəyərlərdən imtina olunması ölümlə eyniləşdirilir.

Vaqif Sultanlının “Ölüm yuxusu” kitabına daxil edilmiş hekayələr özünəməxsus, orijinal, bənzərsiz yazı tərzi ilə seçilməkdədir. Yazıçı qələmə aldığı hekayələrdə mənsub olduğu ictimai mühitin əsirinə çevrilən insanların həyəcan, sarsıntı və qayğılarını əks etdirməyə çalışmışdır.

“Ölüm yuxusu” kitabına daxil edilən povest və hekayələri birləşdirən ümumi cəhət onların daxili-mənəvi ovqata köklənərək qələmə alınması, mövzu-problematika baxımından aktuallıq kəsb etməsi, cəmiyyətdə özünü göstərən özgələşmə, yaddaşsızlaşma, biganələşmə probleminə etiraz motivləri ilə seçilməsidir. Kitabı sifarişlə  www.whytetracks.eu.com saytından əldə etmək olar.

“Xalq qəzeti”