Bu günlərdə çapdan çıxmış “İşığa doğru” kitabı tanınmış telejurnalist, Azərbaycan jurnalistika elminin və audiovizual mədəniyyətimizin inkişafına samballı töhfələr vermiş nəzəriyyəçi-alim, filologiya elmləri doktoru, professor Qulu Məhərrəmlinin həyat və yaradıcılığına həsr edilmişdir. Kitabda görkəmli elm və mədəniyyət xadimləri, sənət adamları, ölkə ictimaiyyətinin bir sıra tanınmış nümayəndələrinin yazıları verilmişdir.

Professor Şirməmməd Hüseynov kitaba giriş sözü yazmışdır. Azərbaycanın böyük söz ustaları - Bəxtiyar Vahabzadə, Sabir Rüstəmxanlı, Ramiz Rövşən, Musa Yaqub və Məmməd Aslanın kitabda yer almış yazılarında Q.Məhərrəmlinin şəxsiyyəti və yaradıcılığı müxtəlif prizmalardan təhlil olunmuşdur. Milli Məclis deputatları Elmira Axundova, Nizami Cəfərov, görkəmli elm və mədəniyyət adamları – Rafiq Əliyev, Nizaməddin Şəmsizadə, Fəxrəddin Veysəlli, Ramiz Abutalıbov, Əjdər Ağayev və başqaları öz məqalələrində professor Q.Məhərrəmlinin çoxşaxəli yaradıcılığından bəhs etmişlər.

Kitabda Azərbaycan mediasının tanınmış simaları, həmçinin kino və televiziya xadimləri - Vasif Babayev, Arif Əliyev, Elçin Şıxlı, Natiq Məmmədli, Rövşən Almuradlı, Oqtay Babazadə, Qüdrət Piriyev və başqaları da  Qulu Məhərrəmlinin Azərbaycan jurnalistikası və audiovizual mədəniyyətimizin inkişafı naminə göstərdiyi xidmətlərdən söhbət açmışlar.

Kitab “Qanun” nəşriyyatında kütləvi tirajla nəşr olunmuşdur.

“Xalq qəzeti”