Finlandiyanın Espoo şəhərində yaşayan 11 yaşlı soydaşımız, skripkaçı Emil Deniz Hartikainen Namazov tanınmış pop və rok ulduzları ilə birgə konsert proqramında çıxış edib. Kiçik yaşlı soydaşımızın qatıldığı “Kids Rock” konsert proqramı Finlandiyanın “Nelonen”  televiziya kanalı ilə yayımlanıb.

Diasporla İş üzrə Dövlət Komitəsindən verilən məlumatda deyilir ki, altı yaşından skripka çalan Emil Deniz Hartikainen Namazov yaşadığı Espoo şəhərində musiqi təhsili alır və tanınmış musiqiçi Grazyni Zeranska-Gebertin şagirdidir. Azyaşlı olmasına baxmayaraq, Emil artıq bir necə musiqi yarışmasının qalibidir. 2011-ci ildə Helsinkidə keçirilmiş musiqi müsabiqəsində 1-ci yerə, 2013-cü ildə Estoniya paytaxtında təşkil olunmuş “Gənc musiqiçilər” beynəlxalq müsabiqəsində 2-ci yerə layiq görülüb. Bu il isə Emil Litvada keçirilmiş və bir çox dövlətlərdən gənc istedadların qatıldığı beynəlxalq musiqi festivalında iştirak edib.

 Qeyd edək ki, gənc skripkaçı Emil Deniz Hartikainen Namazov vaxtaşırı Finlandiyada təşkil olunan konsertlərə dəvət olunur. “Kids Rock” konsertinin təşkilatçısı “Pelastakaa Lapset” xeyriyyə cəmiyyəti Emili öz proqramlarına dəvət edir, hətta ötən il təşkilat gənc musiqiçiyə skripka hədiyyə edib.

Samirə ƏLİYEVA,
“Xalq qəzeti”