Danimarkanın paytaxtı Kopenhagendə yaşayan soydaşlarımız Azərbaycan milli musiqi sənətinin və Şərqdə ilk operanın banisi, görkəmli bəstəkar Üzeyir Hacıbəyovun xatirəsini anmışlar. Diasporla İş üzrə Dövlət Komitəsindən aldığımız məlumatda deyilir ki, Danimarkada fəaliyyət göstərən “Vətən” Cəmiyyəti tərəfindən Azərbaycan evində təşkil olunmuş tədbirdə bu ölkədəki Azərbaycan diasporunun təmsilçiləri fəal iştirak etmişlər.

Dahi bəstəkarın yaradıcılıq gecəsi Azərbaycan torpaqları uğrunda həlak olmuş şəhidlərin ruhunun bir dəqiqəlik sükutla anılması ilə başlamışdır. Daha sonra Azərbaycan himni səsləndirilmişdir.  Gecədə “Vətən” Cəmiyyətinin sədri Səfər Sadiqi, tədbirdə iştirak edən musiqiçilər və digər soydaşlarımız çıxış edərək Üzeyir Hacıbəyovun çoxşaxəli irsi haqqında məlumat vermiş, bu böyük sənətkarın yaradıcılığını yüksək dəyərləndirmişlər.

Xatirə gecəsində iştirak edən “Cırtdan” uşaq yaradıcılıq qrupunun və Aşıq Abbasın çıxışı maraqla qarşılanmışdır. Tədbir dahi bəstəkarın “Çırpınırdı Qara dəniz” mahnısını bütün iştirakçıların birgə ifa etməsi ilə başa çatmışdır.

Samirə ƏLİYEVA,
“Xalq qəzeti”