Azərbaycan Respublikası Mədəniyyət və Turizm Nazirliyinin dəstəyi ilə fəaliyyət göstərən Azərbaycan Konqreslər Bürosu “EİBTM 2014” beynəlxalq turizm sərgisində iştirak edir. Bu barədə Mədəniyyət və Turizm Nazirliyinin mətbuat xidməti məlumat yayıb.

Biznes turizmi sahəsində konfrans, seminar və görüşlərin təşkili üzrə ixtisaslaşmış sərgi olan EİBTM  bu gündən  başlayaraq  noyabrın  20-dək  İspaniyanın Barselona şəhərində keçirilir. Ölkəmizin nailiyyətlərinin və biznes turizm potensialının beynəlxalq aləmdə təbliği ilə məşğul olan Azərbaycan Konqreslər Bürosu tədbirdə xüsusi stendlə təmsil olunmuşdur. Stenddə ölkənin turizm bazarı iştirakçıları və mehmanxanaları haqqında məlumat öz əksini tapmışdır. 51 kvadratmetr sahəsi olan stenddə büronun üzvü olan Fairmont Baku, Hilton Baku, JW Marriott, Kempinski Hotel Badamdar, Absheron Hotel Group və Jumeirah Bilgah Beach Hotel kimi ölkənin aparıcı mehmanxanaları və eyni zamanda, ölkənin peşəkar turizm agentlikləri olan Victory Tour, Millennium Tourism və Regea Travel təmsil olunurlar.

Hər il 3.000-dən çox turizm bazarı iştirakçısını və 15.000-ə yaxın mütəxəssisi bir araya gətirən EİBTM öz fəaliyyətinə 1988-ci ildə Cenevrədə başlayıb.

Beynəlxalq aləmdə aparıcı turizm sərgisi olan EİBTM turizm sənayəsinin aparıcı qüvvələrini bir araya gətirir və burada iştirakçılar üçün ən gözəl imkanları təqdim edir.

Azərbaycan Respublikası Mədəniyyət və Turizm Nazirliyinin nəzdində yaradılan Azərbaycan Konqreslər Bürosunun əsas məqsədi ölkəmizdə işgüzar turizmin inkişafı üzrə strategiyanın həyata keçirilməsidir.

2013-cü ilin sonlarından fəaliyyətə başlayan büro Azərbaycana irimiqyaslı beynəlxalq tədbirlərin cəlb edilməsi, Azərbaycanın beynəlxalq tədbirlərin keçirilməsi üçün inkişaf edən məkan kimi təbliğ və təqdim olunması üçün çalışır.

M.MÜKƏRRƏMOĞLU,

“Xalq qəzeti”