Rusiyanın  Çuvaş Respublikasının paytaxtı Çeboksarı şəhərində ölkədə yaşayan müxtəlif xalqların “Birlik günü” çərçivəsində Nizami Gəncəvinin həyat və yaradıcılığına həsr olunmuş poeziya gecəsi keçirilmişdir.

Ümumrusiya Azərbaycan Konqresinin (ÜAK) Çuvaş regional bölməsinin təşkilatçılığı ilə baş tutan tədbirdə Çuvaş Respublikasının başçısı  Mixail İqnatyev, dövlət və hökumət strukturlarının, qeyri-hökumət təşkilatlarının nümayəndələri, elm  və mədəniyyət xadimləri iştirak etmişlər.

Respublikanın Mədəniyyət naziri Vadim Yefimov iştirakçıları təbrik edərək “Birlik günü” dövlət bayramının millətlərarası sülhün qorunub saxlanılmasında böyük rol oynadığını və tədbirin əhəmiyyətini qeyd etmişdir.

Daha sonra iştirakçılar “dəyirmi masa” arxasında ölkədə yaşayan xalqların inkişafı ilə bağlı müzakirələr aparmışlar. ÜAK-ın Çuvaş regional bölməsinin rəhbəri Əziz Bədirov “hər millətin sərvəti onun mədəniyyətinin zənginliyi ilə müəyyən edilir” fikrinə söykənərək xalqlar arasında dostluğun möhkəmləndirilməsi üçün milli mədəniyyət və ənənələrin qarşılıqlı zənginləşməsini təmin etməyin vacib olduğunu vurğulamışdır.

Regional bölmənin rəhbəri Azərbaycan Respublikası və Rusiya Federasiyası arasında ikitərəfli əlaqələrin inkişafına, regionda Azərbaycan diasporunun inteqrasiyasına, ÜAK-ın Çuvaş regional bölməsinin mədəniyyət və təhsil layihələrinin reallaşmasına göstərdiyi dəstəyə görə Çuvaş Respublikasının başçısı Mixail İqnatyevə Diasporla İş üzrə Dövlət Komitəsi adınan təşəkkürnamənə və Azərbaycan milli mədəniyyətini özündə əks etdirən hədiyyələr təqdim etmişdir.

Daha sonra ictimai fəaliyyətinə və mədəniyyətlərarası əlaqələrin inkişafına verdiyi töhfələrə görə ÜAK-ın Çuvaş regional bölməsinin rəhbəri Əziz Bədirova Çuvaş Respublikasının başçısı tərəfindən təşəkkürnamə təqdim olunmuşdur.

Tədbir Dövlət Opera və Balet teatrında təntənəli konsert proqramı ilə yekunlaşmışdır. Xatırladaq ki,  2012-ci ildə Çuvaş Respublikasının paytaxtı Çeboksarı şəhərində Diasporla İş üzrə Dövlət Komitəsinin təşkilatçılığı ilə dahi Azərbaycan şairi Nizami Gəncəvinin 870 illik yubileyi qeyd olunmuşdur.

Samirə ƏLİYEVA,

“Xalq qəzeti”