Xəbər verdiyimiz kimi, noyabrın 5-də Üçüncü Bakı Beynəlxalq Teatr Konfransı öz işinə başlayıb. AzərTAc xəbər verir ki, rəsmi açılış mərasimindən sonra beynəlxalq konfrans öz işini plenar iclaslarla davam etdirib.

Gün ərzində “Hindistanda Qərb pyeslərinin adaptasiya məsələləri (Benqal teatrı nümunəsində)”, “Teatr kollayder kimi”, “Qızğın yaradıcılıq”, “Azərbaycan teatrının dünya teatr prosesində rolu” “Mədəniyyətlərimiz arasında fərqlərdən fərqlər mədəniyyətinə doğru”, “Dəyişən dünyada sənətin əhəmiyyəti” və digər mövzularda məruzələr dinlənilib.

Çıxışlarda müxtəlif ölkələrin teatr nümayəndələrini, rejissorları, tənqidçiləri, alimləri bir araya toplayan Üçüncü Bakı Beynəlxalq Teatr Konfransının əhəmiyyəti xüsusilə vurğulanıb.

Qeyd edilib ki, teatrın salamat qalmaq şansı onun özünün kimliyinin nüvəsini kəşf edərkən mümkün olar. Bu isə aktyorlarla bağlıdır. Tamaşa emosiyalarımızla üst-üstə düşərsə, internet onu əvəzləyə bilməz. Müxtəlif texnologiyalardan istifadə, eləcə də əyləncə imkanları genişlənsə də, teatrın üstünlüyü qalır. Bu üstünlük isə teatrın canlılığı və tamaşaçı ilə birbaşa təmasındadır.