İtaliyanın ANSA xəbər agentliyi Azərbaycanın “XVII Arxeoloji turizm üzrə Aralıq dənizi yarmarkası”nda xüsusi qonaq qismində iştirakı ilə bağlı məqalə yayıb. Məqalədə bildirilir ki, qədim tarixi abidələr, qalalar, məscidlər, mədrəsələr, fərqli adət-ənənələr, gözəl təbiət və müasirlik, zəngin mətbəx, musiqi Azərbaycanın əsas özəllikləridir. Bu Qafqaz ölkəsi heç də təkcə zəngin neft ehtiyatlarına görə tanınmır. Azərbaycan ilə bağlı italiyalıları maraqlandıran fərqli məqamlar çoxdur. İtaliya ilə mədəni əlaqələrini getdikcə genişləndirən Azərbaycan ölkəmizin mədəni həyatına önəmli töhfələr verməkdədir. Prezident İlham Əliyevin cari ilin iyulunda İtaliyaya səfəri zamanı Romanın Aleksandriya ərazisində qazıntıların aparılmasına Azərbaycan tərəfindən maddi yardımın ayrılması bu töhfənin ən gözəl nümunələrindəndir. Azərbaycanın birinci xanımı Mehriban Əliyevanın rəhbərlik etdiyi Heydər Əliyev Fondu tərəfindən həyata keçirilən layihələri xüsusi qeyd etmək lazımdır.

Yazıda Azərbaycanın Mədəniyyət və Turizm nazirinin birinci müavini Vaqif Əliyevin fikirlərinə yer verilib: “Azərbaycan müstəqilliyini bərpa etdikdən sonra mədəni irsimizin təbliği istiqamətində mühüm işlər görüldü. Artıq Azərbaycana dünyanın istənilən ölkəsindən turistlər gəlir. İtaliyalılar da ölkəmizə səfər etməyə böyük maraq göstərirlər. Turizm sahəsində əməkdaşlığımızı genişləndirməyə yaxşı imkan var”.

Maqsud DADAŞOV,

AzərTAc-ın xüsusi müxbiri

Roma