Nəcəf bəy Vəzirov adına Lənkəran Dövlət Dram Teatrında yazıçı-jurnalist Ağaddin Babayevin “Üç qardaş” nağıl-tamaşasının premyerası olub.

Tamaşa  “Məlikməmməd” xalq nağılının motivləri əsasında hazırlanıb. Lakin müəllif və yaradıcı heyət nağılda cərəyan edən hadisələrə yeni don geydirməklə Padşahın oğlanlarının üçünü də müsbət obraz kimi qələmə veriblər. Məlikməmməd bədheybət divi yaralayaraq ona sehrli almaları aparmağa imkan vermir, daha sonra divin arxasınca zülmət dünyasına gedərək onu öldürür, Qarı nənənin qızını əjdahanın, simurq quşunun balalarını isə ilanın əlindən qurtarır və s.

 Maraqla baxılan tamaşanın quruluşçu rejissoru əməkdar artist Təvəkkül Əliyev, quruluşçu rəssamı Tərlan Sadıqov, musiqi tərtibatçısı Fərahim Fərəcovdur. Əsas rolları aktyorlardan Miraslan Ağayev, Zemfira Nəcəfova, Hikmət Cəfərov, Emin Fərzullayev, Sayad Əliyev, Tərlan Abdullayev, Əli Nurullazadə, Gülər Kərimova və başqaları ifa edirlər.

 “Üç qardaş”  Ağaddin Babayevin Lənkəran teatrında tamaşaya qoyulmuş sayca üçüncü səhnə əsəridir.

Əli NƏCƏFXANLI,

“Xalq qəzeti”nin bölgə müxbiri