Kişineuda Azərbaycanın Moldovadakı səfirliyinin dəstəyi ilə Azərbaycan Respublikasının UNESCO işləri üzrə Milli Komissiyası və Moldova Respublikasının UNESCO işləri üzrə milli komissiyası tərəfindən həyata keçirilən “Bir-birimizi eşidək, dinləyək və anlayaq” layihəsinin birinci mərhələsi keçirilib. Bu layihənin məqsədi Azərbaycan mədəniyyətini Moldovada populyarlaşdırmaq, mədəniyyətlərarası dialoq sahəsini genişləndirmək, bir-birinin mədəniyyətini və ənənələrini öyrənmək yolu ilə Moldova və Azərbaycan gəncləri arasında yeni əlaqələr yaratmaqdır.

Mədəni layihənin birinci mərhələsində Kişineu şəhərindəki səkkiz orta məktəb-liseyin şagirdləri iştirak ediblər. Bu məktəblərin hər biri Azərbaycanın tarixinə, mədəniyyətinə, təbiətinə, iqtisadiyyatına, ölkəmizin müasir dövrdə qazandığı nailiyyətlərə həsr edilmiş müxtəlif mövzularda təqdimatlar hazırlayıb göstərib. Moldova məktəblərinin şagirdləri seçdikləri mövzulara böyük məhəbbət və məsuliyyət hissi ilə yanaşıblar. Onların çıxışları orijinallığı ilə fərqlənib.

Bu mədəni layihənin bütün mərhələlərinin yekunlarına əsasən qaliblər mükafatlandırılacaq, Moldovanın dövlət dilində Azərbaycan xalq nağılları kitabı nəşr ediləcək.

AzərTAc