Şəki şəhərində Mədəniyyət və Turizm Nazirliyi, Şəki Şəhər İcra Hakimiyyəti və Azərbaycan Teatr Xadimləri İttifaqının birgə təşkilatçılığı ilə “Azərbaycan teatrı 2009-2019-cu illərdə” Dövlət Proqramı çərçivəsində keçirilən Şəki I Beynəlxalq Teatr Festivalı öz işinə başlamışdır.

Həmin gün həmçinin Azərbaycan milli peşəkar teatrının 142-ci mövsümünün açılışı keçirilmişdir. Rəsmi açılış mərasimindən sonra Sabit Rəhman adına Şəki Dövlət Dram Teatrının yaradıcı kollektivi tamaşaçılara festivalın ilk tamaşasını – İlyas Əfəndiyevin “Sevgililərin cəhənnəmdə vüsalı” əsəri əsasında hazırlanan tamaşanı təqdim etmişlər.

Respublikanın 12 teatrının, on iki tamaşa ilə çıxış etdiyi festival çərçivəsində Şəki Dövlət Dram Teatrının foyesində müxtəlif sərgilər təşkil olunur.

Festivalda bu günədək Azərbaycan Dövlət Gənc Tamaşaçılar Teatrının, Azərbaycan Dövlət Kukla Teatrının, Kalmıkiya Respublikasının Milli Dram Teatrının, Qazaxıstan Dövlət Akademik Uşaq və Gənclər Teatrının, Gəncə Dövlət Dram  Teatrının, Şuşa Dövlət Musiqili Dram Teatrının və Şəki Dövlət Dram Teatrının kollektivləri çıxış etmişlər. Festivalın bağlanış günündə, yəni sentyabrın 19-da Şəkidə görkəmli gülüş ustası, xalq artisti, Dövlət mükafatı laureatı Lütfəli Abdullayevin yubileyinin keçirilməsi və büstünün açılması planlaşdırılır.

Şəki Beynəlxalq Teatr Festivalının iki ildən bir keçirilməsi planlaşdırılır.

İ.HƏSƏNOV,

“Xalq qəzeti”nin bölgə müxbiri