Avqustun 27-də İtaliyanın şimalında, Lido adasındakı “Kino sarayı”nda 71-ci Venesiya kinofestivalının açılış mərasimi baş tutub.  “Berdmen” filminin premyerası ilə başlayan festivalın açılışında  Edvard Norton, Emma Stoun, Emi Rayan, Maykl Kiton və rejissor Alexandro Qonsales İnyarritu ilə yanaşı, moda və incəsənət  dünyasının tanınmış simaları görünüblər.

Cəfər Cabbarlı adına “Azərbaycanfilm” kinostudiyasının istehsalı olan “Nabat” filmi kinofestivalın əsas müsabiqədən sonra ikinci vacib bölməsi sayılan “Horizontlar” proqramına daxil edilib. Filmin quruluşçu rejissoru Elçin Musaoğlu, ssenari müəllifləri Elçin Musaoğlu və Elxan Nəbiyev, quruluşçu operatoru Abdulrəhim Beşarat (İran), prodüseri Müşfiq Hətəmovdur. Ekran əsərində əsas rolları Fatimə Motamed Arya (İran), Vidadi Əliyev, Ramin Zeynalov, Sabir Məmmədov və başqaları canlandırıblar.

 “Azərbaycanfilm” kinostudiyasının direktoru Müşfiq Hətəmovun verdiyi məlumata görə, bu, eyni zamanda filmin dünya premyerasının başlanğıcı olacaq. Onun sözlərinə görə  filmə baxış sentyabrın 5-də olacaq.  Festivalda ekran əsərlərini 9 münsif qiymətləndirəcək. Fransalı bəstəkar Aleksandr Deplanın rəhbərlik etdiyi heyətə britaniyalı aktyor Tim Rot, alman rejissoru Filip Qreninq, italiyalı aktrisa Karla Verdone və başqaları daxildir.

Deyd edək ki, 71-ci Venesiya kinofestivalı sentyabrın 6-dək davam edəcək. Bu il əsas baxış müsabiqəsində bütün dünyadan olan rejissorların 20 filmi var.

M.MÜKƏRRƏMOĞLU,

“Xalq qəzeti”