Azərbaycanın mədəniyyət və turizm naziri Əbülfəs Qarayevin 2012-ci ildə Riqaya səfəri  Latviya-Azərbaycan mədəni əlaqələrinin inkişafına yeni təkan verib.

Latviya  Mədəniyyət Nazirliyi dövlət katibinin müavini Uldis Liyelpeters  bunu AzərTAc-ın müxbirinə  müsahibəsində bildirib. O qeyd edib ki, Ə.Qarayevin səfəri zamanı Latviya ilə Azərbaycan arasında mədəni əlaqələrin, qarşılıqlı anlaşmanın və mehriban qonşuluq münasibətlərinin  möhkəmlənməsinə yönəlmiş Mədəni Əməkdaşlıq Proqramı imzalanıb.

 U.Liyelpeters  diqqətə çatdırıb ki, Əməkdaşlıq Proqramı  çərçivəsində bir sıra birgə mədəni  tədbirlər keçirilir.  Məsələn, Azərbaycanda Latviya Mədəniyyət Günləri çərçivəsində “Qız Qalası” qalereyasında latviyalı rəssamların - əsərləri bir çox şəxsi kolleksiyalarda və muzeylərdə, o cümlədən  Bakıdakı Müasir İncəsənət Muzeyində saxlanan Andris Vitolinşin, eləcə də Aleksey Naumovun  işləri nümayiş etdirilib.  U.Liyelpeters  qeyd edib ki, bu yay Riqa Dumasında Azərbaycan rəssamlarının “Şərq nağılı” adlı cavab sərgisi təşkil edilib.

Dövlət katibinin müavini bildirib ki, Liepaya simfonik orkestri tanınmış azərbaycanlı dirijor Yalçın Adıgözəlov ilə sıx əlaqə saxlayır. O, pianoçu Yeganə Axundova ilə birlikdə dəfələrlə “Liepaya yayı” festivalında iştirak edib.

U.Liyelpeters “Latviya azərbaycanlı fotoqrafların gözü ilə” - “Azərbaycan latviyalı fotoqrafların gözü ilə” adlı daha bir layihəni qeyd edib. Bakı qalereyasında latviyalı fotoqraflar Silviya Danelsone, Sintiya Zivarte, Ervins Palambaxs və Normunds Daudişsin Azərbaycanın canlı mənzərələrini əks etdirən əsərlərinin sərgisi keçirilib.

U.Liyelpeters deyir ki, Latviyanın “Dd-studio” şirkətinin Azərbaycanın dövlət muzeyləri ilə əməkdaşlığını qeyd etməmək olmaz. Bu şirkət “Qız Qalası” muzey ekspozisiyasının, eləcə də atəşpərəstlərin Bakıdakı “Atəşgah” məbədinin  rəqəmsal dizaynının işlənib hazırlanması ilə məşğuldur.

Dövlət katibinin müavini qeyd edib ki, imzalanmış sənəddə incəsənətin bütün sahələrinə diqqət ayrılır. Latviya və Azərbaycan tərəfləri birgə konsert layihələrinin, qastrolların təşkilinə dəstək verirlər. Ümid edirik ki, gələcəkdə latviyalı musiqiçilər Bakıda Beynəlxalq Mstislav Rostropoviç Festivalında, eləcə də Qəbələ Beynəlxalq Musiqi Festivalında təmsil olunacaqlar.

U.Lielpeters Ventspilsdə həyata keçirilən möhtəşəm “Yazıçı və Tərcüməçilərin Beynəlxalq Evi” layihəsindən söz açıb. Bir növ yaradıcılıq iqamətgahı olan bu Evin məqsədi Latviyada ədəbiyyatın inkişafına, mədəniyyətlərarası dialoqa kömək etməkdir. Yaşamaq və işləmək üçün hər cür şəraiti olan İqamətgah Dövlət Mədəniyyət Fondunun maddi dəstəyi sayəsində həvəsləndirici təqaüd almaq, eləcə də müxtəlif ölkələrdən olan yazıçı və tərcüməçilərlə görüşlər keçirmək imkanı vardır.  U.Liyelpetersin sözlərinə görə, Yazıçı və Tərcüməçilərin Beynəlxalq Evi Azərbaycan ziyalılarının nümayəndələrini də bu evə gəlməyə və kollektiv yaradıcılıq layihələrinə qoşulmağa dəvət edir.

U.Liyelpeters bildirir ki, Əməkdaşlıq Proqramında kitabxana işi sahəsində də əlaqələrin möhkəmləndirilməsi nəzərdə tutulub. Latviya informasiya-kitabxana xidməti sahəsində beynəlxalq səviyyədə böyük uğurlar qazanıb və öz təcrübəsini bölüşə bilər.

Latviya və Azərbaycan tamaşaçılarının mədəniyyət tədbirlərinə tələbatından danışan U.Liyelpeters vətəndaşların mədəniyyətə və tarixə qarşılıqlı maraqlarının artırılması məqsədi ilə qarşıdakı illərdə də mübadilə proqramları təcrübəsini davam etdirməyin vacibliyini  vurğulayıb.  Axı ölkələrin əməkdaşlıq etmək arzusu mədəniyyətdən başlayır.

Nigar CƏFƏRLİ,

AzərTAc-ın xüsusi müxbiri

Riqa