Altı ildir keçirilməsinə baxmayaraq Qəbələ festivalı beynəlxalq musiqi arenasında öz layiqli yerini tutub. Qəbələyə gəlməmişdən əvvəl burada keçirilən festivalın əhatə dairəsi haqqında çox az məlumatlı idim. Festivalın belə gözəl bir yerdə və möhtəşəm şəkildə keçirilməsi məni valeh etdi.

Bu sözləri Heydər Əliyev Fondunun təşkilatçılığı ilə keçirilən VI Qəbələ Beynəlxalq Musiqi Festivalının iştirakçısı, Yohannesburq Simfonik Orkestrinin üzvü, Pretoriya Universitetinin müəllimi, skripka ifaçısı xanım Larisa Babenko AzərTAc-a müsahibəsində deyib.

Festivalın təşkilatçılığını yüksək qiymətləndirən L.Babenko Qəbələyə toplaşan dünyanın məşhur musiqi xadimlərinin iştirakı ilə bir sırada konsert verməyin məsuliyyətli olduğunu bildirib.

Larisa Babenko deyib: “Burada olmaq bir musiqiçi kimi əsl uğurdur. Həqiqətən də bu möhtəşəm incəsənət bayramı dünya musiqi mədəniyyətinə öz dəyərli töhfəsini vermiş festivallardan birinə çevrilir. Qəbələ kimi gözəl diyarı gəzmək, belə bir qədim məkanı tanımaq, eyni zamanda, görkəmli sənət adamları ilə eyni səhnəni bölüşmək, birgə tamaşaçı qarşısına çıxmaq çox maraqlı oldu. Bu festivaldan musiqi duyumu olan hər kəs zövq ala bilər”.