Azərbaycan Milli Elmlər Akademiyasının (AMEA) Milli Azərbaycan Ədəbiyyatı Muzeyinin direktoru, akademik Rafael Hüseynovun UNESCO səviyyəsində yaradıcılığının 900 illik yubileyi qeyd edilən, XII əsrin görkəmli Azərbaycan şairəsi Məhsəti Gəncəvinin həyat və yaradıcılığından bəhs edən, dünyanın 21 dilinə tərcümə olunmuş əsəri bir çox ölkələrin mədəniyyət mərkəzləri, kitabxanalar və elmi müəssisələrinə göndərilib. 

Muzeyin mətbuat xidmətindən bildiriblər ki, İspaniya İqtisadiyyat və Maliyyə Kral Akademiyasının kitabxanası ilə əməkdaşlıq əlaqələri qurmaq məqsədilə AMEA-nın Milli Azərbaycan Ədəbiyyatı Muzeyi tərəfindən kitabın ispan dilində olan nüsxəsi akademiyaya göndərilib və onun kitabxana fonduna daxil edilib. 

Gələcəkdə muzey və İspaniya İqtisadiyyat və Maliyyə Kral Akademiyası arasında kitab mübadilələri, konfransların təşkili və digər ortaq maraq kəsb edən tədbirlərin həyata keçirilməsi də nəzərdə tutulur.

Xatırladaq ki,  bu il mayın 30-da Azərbaycan Milli Elmlər Akademiyası və İspaniya İqtisadiyyat və Maliyə Kral Akademiyası arasında araşdırmaların daha da genişləndirilməsinə dair memorandum imzalanıb.

AzərTAc