Nizami Kino Mərkəzində Mədəniyyət və Turizm Nazirliyinin təşkilatçılığı ilə II Bakı Beynəlxalq Turizm Filmləri Festivalı keçiriləcək. Bu barədə Mədəniyyət və Turizm Nazirliyinin  rəsmi saytı məlumat yayıb.

 Festivala ümumilikdə 55 ölkədən 405 film göndərilib. Festivalın təşkilat komitəsi müsabiqə proqramını açıqlayıb. 68 film müsabiqə proqramına daxil edilib. Müsabiqə 6 kateqoriyada aparılacaq. Qeyd edək ki, müsabiqə proqramında 7 Azərbaycan filmi də iştirak edir. İyunun 26-27 və 28-də hər gün saat 14.00-dan etibarən festivalın müsabiqə filmləri nümayiş olunacaq. Nümayişlərə giriş sərbəstdir.

İyunun 25-də saat 17.00-da keçiriləcək mətbuat konfransı ilə festival açıq elan ediləcək. Həmin gün 19.00-da Nizami Kino Mərkəzində festivalın rəsmi açılışı keçiriləcək. Açılışda “Ölkə, region, şəhər” kateqoriyasından filmlər nümayiş olunacaq. Festivalın bağlanış mərasimi isə ayın 28-də nəzərdə tutulur.

Festivala xaricdən 50 qonaq dəvət edilib. Bu qonaqlardan bir hissəsi müsabiqədə iştirak edən filmlərin rejissorları, bəziləri isə dünyanın müxtəlif yerlərində keçirilən turizm filmləri festivallarının direktorlarıdır.

Festival çərçivəsində “Dünya sübhdən – günbatanadək” layihəsi çərçivəsində “Bakı sübhdən – günbatanadək” layihəsinin təqdimatı keçiriləcək. Layihə çərçivəsində Polşa kinematoqrafçılarının nəzəri və əyani ustad dərsləri keçiriləcək, sonda gənc rejissorlar Bakı haqqında sənədli film istehsal edəcəklər.  Məlumat üçün bildirək ki, Bakı Beynəlxalq Turizm Filmləri Festivalı mənzil-qərargahı Avstriyanın Vyana şəhərində yerləşən Beynəlxalq Turizm Filmləri Festivalları Komitəsinin (CIFFT) tamhüquqlu üzvüdür. Bakı Beynəlxalq Turizm Filmləri Festivalının rəsmi tərəfdaşı “JW Marriot Absheron Baku”, informasiya dəstəkçiləri İctimai Televiziya və APA Holdinqdir. Festival “Azanfilm” studiyasının təşkilati dəstəyi ilə reallaşır.

M.MÜKƏRRƏMOĞLU, “Xalq qəzeti”