Dünən Azərbaycan İstiqlal Muzeyinin ekspozisiyasında 28 May Respublika Gününə və 1 İyun Uşaqların Beynəlxalq Müdafiə Gününə həsr olunmuş tədbir-sərgi təşkil olunmuşdur. “Müstəqil Vətənin işıqları” adlı sərgidə Nizami rayonunun Heydər Əliyev parkında fəaliyyət göstərən rəssamlar dərnəyinin 39 nəfər şagirdinin, gənc rəssamlar Bəhram Bəhmanov və Ayla Mehrəliyevanın 124 ədəd əsəri nümayiş olunur.

Tədbirdə Azərbaycan İstiqlal Muzeyinin direktoru Fəridə Şəmsi, Azərbaycan Rəssamlar İttifaqının katibi Ağəli İbrahimov, Nizami rayonunun Heydər Əliyev parkında fəaliyyət göstərən rəssamlar dərnəyinin rəhbəri Aysel Əmirova və digər qonaqlar iştirak etmişlər.

Tədbirin bədii hissəsində Yasamal rayonunun 24 saylı Uşaq Yaradıcılıq Mərkəzinin hazırladığı bədii-musiqili kompozisiya nümayiş olunmuşdur. Uşaqlar təşəkkürnamə ilə təltif olunmuşlar. Tədbirdə gənc rəssamlar, Azərbaycan Turizm İnstitutunun tələbələri, Nizami rayonunun Heydər Əliyev parkında fəaliyyət göstərən rəssamlar dərnəyinin, Yasamal rayonunun  24 saylı Uşaq Yaradıcılıq Mərkəzinin üzvləri, Milli Qvardiyanın əsgərləri və digər qonaqlar iştirak etmişlər.

M.MÜKƏRRƏMOĞLU,

“Xalq qəzeti”