Müasir dizayn və arxitektura sahəsində ən nüfuzlu institutlardan biri olan London Dizayn Muzeyi (Design Museum) illik “Designs of the Year-2014” mükafatının qaliblərini açıqlamışdır.

Trend xəbər verir ki, Britaniyanın BBC telekanalının saytında verilən məlumata görə, “Arxitektura” nominasiyasında qalib Bakıdakı Heydər Əliyev Mərkəzi olmuşdur.

Münsiflər heyəti Heydər Əliyev Mərkəzini belə qiymətləndirmişlər: “Bu, gözəldir, ilhamvericidir. Bu, xüsusi dahiliyin aydın görüntüsüdür və biz düşünürük ki, bu, çox gözəl binadır”.

Muzey dizaynda yeni tendensiya və mövzuları daha yaxşı şəkildə nümayiş etdirən “Arxitektura”, “Digital”, “Dəb”, “İnteryer dizaynı”, “Qrafika”, “Məhsullar” və “Nəqliyyat” nominasiyalarında yeddi qalib müəyyən etmişdir.

Yeddi qalib “Design of the Year-2014”ün əsas mükafatı uğrunda yarışacaq. Qalib iyunun 30-da Londonda “St Martins Lane” hotelində elan ediləcək.

1989-cu ildə Londonda yaradılmış Dizayn Muzeyi dünyada aparıcı muzeydir. Onun ekspozisiyaları arxitektura və dizayna həsr edilmişdir. Muzey dizaynın bütün sahələrini, o cümlədən qrafika, dəb və digərlərini əhatə edir.

İllik “Designs of the Year” dizayn mükafatı “Arxitektura”, “Digital”, “Dəb”, “İnteryer dizaynı”, “Qrafika”, “Məhsullar” və “Nəqliyyat” nominasiyalarında ən yaxşı innovasiya layihələrini də seçir.

Heydər Əliyev Mərkəzi Bakıda Heydər Əliyev prospektində inşa edilən mədəni mərkəzdir. Mərkəzin layihəsi 2007-ci ildə dünya şöhrətli arxitektor Zaha Hadid tərəfindən hazırlanmışdır. Heydər Əliyev Mərkəzi müasir Bakının simvollarından biri hesab edilir.