İslam Əməkdaşlıq Təşkilatının İqtisadi və Ticarət Əməkdaşlığı üzrə Daimi Komitəsinin (COMCEC) təşəbbüsü ilə Layihə Dövriyyəsinin İdarəEdilməsi sistemi çərçivəsində müxtəlif sahələr üzrə təqdim olunmuş 30-dan çox layihə arasında Azərbaycan Respublikası Mədəniyyət və Turizm Nazirliyi tərəfindən turizm sahəsi üzrə təqdim olunmuş “Ümumi Mədəni İrs Şəhərləri” adlı layihə qalib gəlmişdir. Bu barədə nazirliyin mətbuat xidməti məlumat yaymışdır.

2013-cü il sentyabrın 2-də elan olunmuş layihə çağırışına əsasən Mədəniyyət və Turizm Nazirliyi tərəfindən təqdim edilmiş layihə 6 ay müddəti əhatə edən bir neçə mərhələdən keçərək müvəffəqiyyət qazanan layihələr sırasına daxil edilmişdir. Layihə Türkiyənin İnkişaf Bankının təqdim etdiyi qrant və Mədəniyyət və Turizm Nazirliyinin maliyyə dəstəyi ilə həyata keçiriləcəkdir.

Cari ilin aprel-sentyabr aylarını əhatə edəcək layihə COMCEC-ə üzv olan 4 ölkədə (Azərbaycan, Qazaxıstan, Özbəkistan və Türkiyə) mədəni turizm, xüsusilə arxeoloji turizm potensialının araşdırılması, oxşar mədəni irs nümunələrinə sahib olan bölgələrin müəyyən edilməsi, araşdırmaların nəticələrinə əsasən bu ölkələri birləşdirən ortaq turizm məhsulunun yaradılmasını əhatə edir.

Layihənin məqsədi COMCEC regionunda beynəlxalq səviyyədə rəqabətli və davamlı turizm sahəsinin inkişafına nail olmaq və əsas turizm bazarlarında bu ölkələrin mədəni turizm resursları barədə məlumatlılığı artırmaqdan ibarətdir. Layihənin reallaşdırılması, eyni zamanda, iştirakçı ölkələrin turizm sahəsində dövlət və özəl sektor nümayəndələri arasında əməkdaşlığın gücləndirilməsinə, dördtərəfli çərçivədə turizm mübadiləsinin artmasına, bu bölgəyə daha çox turistlərin cəlb edilməsinə, İslam mədəni irsinin qorunmasına və COMCEC regionunun tarixi və mədəni irsinin beynəlxalq səviyyədə təbliğatına xidmət edəcəkdir.

M.MÜKƏRRƏMOĞLU, “Xalq qəzeti”