Oktyabrın 1-də Heydər Əliyev Mərkəzində Azərbaycanın xalq rəssamı Tahir Salahovun “Əsrlərin qovuşuğunda” adlı fərdi sərgisinin açılış mərasimi keçiriləcək.

Heydər Əliyev Mərkəzindən AzərTAc-a bildirmişlər ki, ekspozisiyada məşhur fırça ustasının müxtəlif illərdə çəkdiyi rəsmlər, həmçinin xalça üzərindəki əsərləri nümayiş olunacaqdır. Onların sırasında Azərbaycan xalqının ümummilli lideri Heydər Əliyevin portreti,  həmçinin Qara Qarayev, Dmitri Şostakoviç və Mstislav Rostropoviçin portretləri, “Aydan”, “Səhər”. “Abşeron”, “Koroğlu” tabloları, Abşeron triptixi - “Atəşgah”, “Xəzər bu gün”, “Qız qalası”  və digər məşhur əsərləri də vardır. 

Sərgi noyabrın 6-dək davam edəcəkdir.

Tahir Salahov 1928-ci il noyabrın 29-da Bakı şəhərində anadan olmuşdur. O,  Əzim Əzimzadə adına Azərbaycan Rəssamlıq Məktəbini, 1957-ci ildə isə V.İ.Surikov adına Moskva Dövlət İncəsənət İnstitutunu bitirmişdir. “Gecə növbəsindən qayıdanlar” adlı diplom işi ilə nəzərləri özünə cəlb edən T.Salahov rəngkarlıqda “sərt üslub” adlanan istiqamətin əsasını qoymuşdur.

T.Salahov Azərbaycan və Rusiyanın bir çox mükafatlarının laureatı, dünyanın 20-dən çox akademiya və yaradıcılıq təşkilatının fəxri üzvü, ABŞ-ın bir neçə ştat və şəhərinin fəxri vətəndaşı, UNESCO yanında Plastik İncəsənət üzrə Beynəlxalq Assosiasiyanın fəxri prezidentidir.