Teatr səhnələrimiz yenə öz tamaşaçılarını maraqlı tamaşaları ilə sevindirməkdə davam edir. Bir-birindən maraqlı tamaşaları ilə seçilən Cəfər Cabbarlı adına İrəvan Dövlət Azərbaycan Dram Teatrı yeni mövsüm “Soyqırım tarixinin dastanı” tamaşası ilə start vermişdir. Onu da bildirək ki, əsərin müəllifi və quruluşçu rejissoru teatrın direktoru, şair-dramaturq İftixar Piriyevdir.

Tamaşada söz, musiqi və rəqsin dili ilə ermənilərin tarixən türklərə və azərbaycanlılara qarşı həyata keçirdikləri soyqırımdan bəhs olunur. Səhnə əsərində həmçinin epizodik də olsa türk generalı Nuru Paşanın Azərbaycana gəlişi səhnəsi də yer almışdır.

“Soyqırım tarixinin dastanı” tamaşasında xalq artistləri Elmira İsmayılova, Tamella Abdullayeva, əməkdar artistlər Vidadi Əliyev, Vaqif Kərimov, Esmiralda Şahbazova çıxış edəcəklər. Kütləvi səhnələrdə teatrın bütün kollektivi iştirak etmişdir.

Teatrın bu tamaşası ötən teatr mövsümündə Türkiyənin bir sıra şəhərlərində böyük maraqla qarşılanmışdır.

Ülviyyə VAHİDQIZI ,

“Xalq qəzeti”