Daşkənddəki Heydər Əliyev adına Azərbaycan Mədəniyyət Mərkəzində Özbəkistanın dövlət müstəqilliyinin elan edilməsinin 22-ci ildönümünə həsr olunmuş konsert keçirilmişdir.

Konsertdə Daşkənddə yaşayan soydaşlarımız, Azərbaycanın diaspor təşkilatının nümayəndələri, Qadınlar Şurasının və Özbəkistan-Azərbaycan Dostluq Cəmiyyətinin üzvləri, ictimaiyyət nümayəndələri, jurnalistlər iştirak etmişlər.

Heydər Əliyev adına Azərbaycan Mədəniyyət Mərkəzinin direktoru Samir Abbasov qardaş özbək xalqını və bu ölkədə yaşayan soydaşlarımızı Özbəkistanın müstəqillik bayramı münasibətilə təbrik etmişdir. O, bütün sahədə əlaqələrimizin durmadan inkişaf etdiyini, xalqlarımızın dilinin, adət-ənənəsinin, mədəniyyətinin eyni olduğunu diqqətə çatdırmışdır. Bildirmişdir ki, Azərbaycan xalqı qardaş özbək xalqının bütün uğurlarına sevinir.

Özbəkistan-Azərbaycan Dostluq Cəmiyyətinin icraçı direktoru Erkin Nuriddinov və Respublika Azərbaycan Mədəniyyət Mərkəzinin sədri Mobil Məmmədov belə mədəni tədbirlərin Daşkənddə və Bakıda daha çox keçirilməsinin vacibliyinə toxunmuşlar.

Sonra “Şərq təranələri” IX Beynəlxalq musiqi festivalının iştirakçısı Elnarə Abdullayeva “Şirvan” qrupunun müşayiəti ilə muğam və xalq mahnılarımızı məharətlə ifa etmiş və alqışlarla qarşılanmışdır.

Özbəkistanın “Nixol” mükafatı laureatı, populyar müğənni İsrail Saidumarov, həmçinin “Azərbaycan qızları” rəqs ansamblı və “Azərbaycanım” musiqi qrupunun ifaları da iştirakçıların marağına səbəb olmuşdur

Qulu KƏNGƏRLİ,

AzərTAc-ın xüsusi müxbiri

Daşkənd