“YARAT!” Müasir İncəsənət Məkanının dəvətini böyük məmnuniyyətlə qəbul etdim. İki həftə ərzində Bakıda gənclərə ustad dərsləri keçmişəm.

AzərTAc xəbər verir ki, bu sözləri “YARAT!” Müasir İncəsənət Məkanının təqdim etdiyi “Manimals” layihəsinin müəllifi, amerikalı rəssam Mark Cenkins jurnalistlərə müsahibəsində demişdir.

Bildirmişdir ki, layihə “YARAT!” Müasir İncəsənət Məkanının “PARTICIPATE” Baku Public Art" festivalı çərçivəsində Bakının Fəvvarələr meydanında təqdim olunmuşdur. Məqsəd planetin təbii mühitinin deqradasiyasının qarşısını almaq, insan və təbiət arasında harmoniyaya nail olmaqdır. Heykəllər xüsusi qablaşdırılan şəffaf lentdən - “Scotch 3M” yapışqanlı lentdən yaradılmışdır.

Amerikalı rəssam diqqətə çatdırmışdır ki, ustad dərslərində tələbələr böyük həvəslə iştirak etmiş və müvafiq lentlərdən “Animal planet” mövzusunda heykəllər hazırlamışlar. Nəticədə açıq məkanda ictimaiyyət üçün məzmunlu və maraqlı layihə ərsəyə gəlmişdir.