Macarıstanın Cöncöş şəhərində keçirilən XIII beynəlxalq mahnı və rəqs festivalı Şuşa rayonunun “Qarabağ” ansamblının uğurlu çıxışları ilə yadda qalmışdır. Bu  barədə  Mədəniyyət və

Turizm  Nazirliyinin rəsmi saytı məlumat yayıb.

Bu ilin may ayında Cöncöş şəhəri ilə qardaşlaşmaya dair saziş imzalayan Şuşa Rayon İcra Hakimiyyəti beynəlxalq festivala dəvət aldıqdan sonra qısa müddət ərzində Qarabağ musiqi sənətini əks etdirən zəngin proqram hazırlamağa nail olmuşdur. Festival günlərində gənc azərbaycanlı musiqiçilər Çin, Fransa, Serbiya, Portuqaliya, Macarıstan, Ukrayna, Yunanıstan və digər ölkələrdən gəlmiş ifaçılarla birlikdə müxtəlif konsert proqramlarında, habelə festivalın bağlanışında qala-konsertdə iştirak etmiş, qeyri-adi ifaları ilə dinləyicilərin rəğbətini qazanmışlar.

Festival çərçivəsində “Azərbaycan günü” təşkil edilmişdir. Həmin gün xüsusi konsert proqramı ilə çıxış edən gənc sənətçilərimiz minlərlə tamaşaçını ehtizaza gətirmiş, bitib-tükənmək bilməyən alqışlar qazanmışlar. Ənənəvi üçlüyün - tar, kamança və dəfin müşayiəti ilə ifa olunan muğamlar, Qafqaz koloritini əks etdirən rəqslər macar tamaşaçılarının diqqətini xüsusilə cəlb etmişdir. Layihə Azərbaycanın Macarıstandakı səfirliyinin dəstəyi ilə həyata keçirilmişdir.

Festival çərçivəsində tamaşaçılara qədim Azərbaycan şəhəri Şuşa haqqında məlumatlar və Ermənistan silahlı qüvvələri tərəfindən işğal olunmuş Dağlıq Qarabağla bağlı həqiqətlər də çatdırılmışdır.

Cöncöş şəhərinin meri Laslo Faraqo və Şuşa Rayon İcra Hakimiyyətinin başçısı Bayram Səfərov arasında keçirilən görüşdə gələcək əməkdaşlığın yolları müzakirə olunmuş, merin başçılığı ilə Cöncöş nümayəndə heyətinin bu ilin payızında Azərbaycana səfəri ilə bağlı razılıq əldə edilmişdir.

 M.MÜKƏRRƏMOĞLU,

 “Xalq qəzeti”