İyulun 3-də Parisin mərkəzində yerləşən və əsası 1820-ci ildə qoyulan Passi qəbiristanlığında SSRİ-nin və Azərbaycan Respublikası Dövlət mükafatı laureatları, SSRİ və Azərbaycanın xalq rəssamı, Azərbaycan Prezidentinin fərdi təqaüdçüsü Toğrul Nərimanbəyovun dəfni ilə əlaqədar vida mərasimi keçirilmişdir.

Mərasimdə mədəniyyət və turizm nazirinin müavini Nazim Səmədov və Rəssamlar İttifaqının sədri Fərhad Xəlilov çıxış edərək Azərbaycan  rəngkarlığının tanınmış nümayəndəsi Toğrul Nərimanbəyovun özünəməxsus yaradıcılıq yolu keçdiyini, onun fırçasından çıxan tabloların nəinki Azərbaycanın, habelə dünyanın  məşhur muzeylərində nümayiş etdirildiyini xatırlatmış, rəssamın əməyinin dövlətimiz tərəfindən yüksək qiymətləndirildiyini qeyd etmiş, T.Nərimanbəyovun xatirəsinin Azərbaycan xalqı tərəfindən daim əziz tutulacağını diqqətə çatdırmışlar.

Azərbaycan hökuməti və xalqı adından Nazim Səmədov və Fərhad Xəlilov mərhumun ailə üzvlərinə başsağlığı vermişlər. Mərhumun məzarı üzərinə Azərbaycan Prezidenti, Mədəniyyət və Turizm Nazirliyi, ölkəmizin Fransadakı səfirliyi və Azərbaycan Rəssamlar İttifaqı adından əklillər qoyulmuşdur.

Vida mərasimində mərhumun ailə üzvləri, diasporumuzun təmsilçiləri və Parisin müxtəlif ali məktəblərində təhsil alan azərbaycanlı tələbələr iştirak etmişlər.

Xatırladaq ki, Toğrul Nərimanbəyov iyunun 2-də 83 yaşında Parisdə vəfat etmişdir.

Allah rəhmət etsin!

Əsgər ƏLİYEV,

AzərTAc-ın xüsusi müxbiri

Paris