Heydər Əliyev Mərkəzinin Azərbaycan xalqının ümummilli liderinin 90 illik yubileyi münasibətilə müəllimlər, jurnalistlər, gənclər, rejissorlar, əcnəbi fotoqraflar arasında elan etdiyi müsabiqə başa çatmışdır.

AzərTAc xəbər verir ki, bununla bağlı iyunun 22-də Heydər Əliyev Mərkəzində qaliblərin mükafatlandırılması mərasimi olmuşdur.

Heydər Əliyev Mərkəzinin icraçı direktoru Anar Ələkbərov Mərkəzin fəaliyyəti barədə danışmışdır. Bildirilmişdir ki, Heydər Əliyev Mərkəzi fəaliyyətə başladığı gündən bir sıra layihələr həyata keçirmişdir. Möhtəşəm layihələrdən biri də ulu öndərimiz Heydər Əliyevin 90 illik yubileyi münasibətilə elan olunmuş müsabiqədir.

 Anar Ələkbərov müsabiqənin qaliblərini təbrik etmiş və uğurlar arzulamışdır.

Mərasimdə bildirilmişdir ki, nəticələri elan olunan müsabiqələrdən əlavə, əsgərlər arasında keçirilmiş müsabiqənin nəticələri 26 iyun – Silahlı Qüvvələr Günü ərəfəsində – iyunun 24-də elan olunacaqdır.

Müsabiqələr gənclər arasında “Azərbaycanımla fəxr edirəm”, müəllimlər arasında “Dövlətim üçün layiqli vətəndaş yetişdirirəm”, jurnalistlər arasında “Azərbaycanın xarici siyasətdə ən böyük nailiyyəti”, “Azərbaycan – beynəlxalq layihələrin təhlükəsiz ünvanı”, “Azərbaycan xarici siyasətinin prioritetləri”, rejissorlar arasında Azərbaycanı tanıtım videoçarxları və əcnəbi fotoqraflar arasında “Azərbaycan əcnəbilərin gözü ilə” müsabiqələridir.

Qaliblərə kompyuter, planşet və digər hədiyyələr təqdim olunmuşdur.

Qaliblər arasında AzərTAc-ın müxbiri Samirə Quliyeva da vardır.