Azərbaycanın xalq artisti, respublika dövlət mükafatları laureatı Həsən Turabovun 75 illiyi ilə  bağlı Teatr Xadimləri İttifaqında (Aktyor Evi) təntənəli tədbir keçirildi. Xalq artisti, Teatr Xadimləri İttifaqının sədri Azərpaşa Nemətov Həsənağa Turabovun Azərbaycan teatr və kino sənətinin inkişafındakı xidmətlərindən danışdı.

O  bildirdi ki, səhnə fəaliyyətinə başladığı ilk illərdən lirik-psixoloji üslubu ilə seçilən Həsənağa Turabov qısa müddətdə Azərbaycan və dünya dramaturqlarının əsərlərində baş rolların ifaçısı kimi teatrın aparıcı sənətkarlarından birinə çevrilib. Həsənağa Turabov Azərbaycan aktyorluq məktəbinin ənənələrini ləyaqətlə davam etdirərək fitri istedadı, zəhmətsevərliyi və yüksək səhnə mədəniyyəti sayəsində yaratdığı rəngarəng və dolğun obrazlarla milli teatr sənətimizi zənginləşdirib. Öz bənzərsiz oyunu ilə Azərbaycan kinosunda yaddaqalan obrazlar yaradıb. Mərhum sənətkar  Gəray bəy, Qaçaq Nəbi rolları ilə əbədi olaraq tamaşaçıların yaddaşlarında yaşayır. Sənətkar 15 il Azərbaycan Dövlət Akademik Milli Dram Teatrına rəhbərlik edib, ömrünün son günlərinə qədər Teatr Xadimləri İttifaqının sədri olub.

Azərpaşa Nemətov bildirdi  ki, Həsənağa Turabovun yeni audio diski hazırlanmışdır. Diskdə səsyazma arxivindən, eləcə də, radionun fondundan Həsənağa Turabovun səsi ilə yazılmış verilişlər toplanmışdır.

Sonra diskin təqdimatı oldu. Tədbirdə Azərbaycanın məşhur sənət adamları, tələbələr və teatrsevərlər iştirak edirdilər.

M.MÜKƏRRƏMOĞLU,

“Xalq qəzeti”