Azərbaycanın Tacikistandakı səfirliyindən aldığımız  məlumatda bildirilir ki, bu günlərdə Düşənbədə ənənəvi “Şaşmakom” festival-simpoziumu keçirilmişdir. Festivalda Tacikistan, Azərbaycan, İran və Əfqanıstandan muğam ustaları iştirak etmişlər.

Tacikistanın möhtəşəm Sədrəddin Ayni adına Dövlət Akademik Opera və Balet Teatrında təşkil olunan festival-simpoziumun açılışında Tacikistan Respublikasının Prezidenti Emomali Raxmon iştirakçıları təbrik etmiş və onlara uğurlar arzulamışdır.

Elmi simpoziumda Azərbaycan Milli Konservatoriyasının rektorunun müavini Akif Quliyevin məruzəsini musiqişünaslar böyük rəğbətlə qarşılamışlar. Azərbaycanın muğam ifaçıları Vüsalə Musayevanın, Hüseyn Məlikovun tarda Rəşad İbrahimovun və kamançada Təbriz Yusifovun müşayiəti ilə çıxışları Opera və Balet Teatrında və Tacikistan Milli Konservatoriyasında təşkil olunan konsertlərdə alqışlarla qarşılanmışdır.

Səfirliyin təşəbbüsü və Tacikistan Mədəniyyət Nazirliyininin dəstəyi ilə azərbaycanlı sənətkarlar Xocənd şəhərinin “Rudəki” sarayında  ümummilli lider Heydər Əliyevin 90 illik yubileyinə həsr olunan konsertdə də çıxış etmişlər. Konsert ötən ilin oktyabrında Gəncə ilə Xocənd şəhərlərinin qardaşlaşması haqqında  imzalanan memoranduma uyğun ilk mədəni tədbir olmuşdur.

Səfir Abbasəli Həsənov Xocənd şəhərində keçirilən yubiley tədbirində qeyd etmişdir ki, ulu öndər Heydər Əliyev sovet dövründə Tacikistan üçün nəzərdə tutulan bir sıra layihələrin həyata keçirilməsinə imza atmışdır. Bununla yanaşı, o, müstəqil Azərbaycana rəhbərlik etdiyi vaxtlarda Tacikstanla münasibətlərin inkişafına xüsusi önəm vermişdir. Musiqiçilərimizi buraya gətirən tacik xalqına, onun mədəniyyətinə və musiqisinə Azərbaycan xalqının dərin məhəbbətidir. Bu konsert isə Tacikistanda ulu öndər Heydər Əliyevin xatirəsinə göstərilən hörmət və rəğbətin göstəricisidir. Bu ilin sentyabr – oktyabr aylarında Üzeyir Hacıbəylinin “Leyli və Məcnun” operası Xocənd şəhərində səhnəyə qoyulacaqdır.

 “Xalq qəzeti”