Mayın 16-da “28 Cinema” kinoteatrında  “28 Cinema”nın və “Nargis” jurnalının birgə təşkilatçılığı ilə kino həvəskarları üçün “Dahi Qetsbi” filminin qapalı premyerası keçirilmişdir.

Mərasimdən əvvəl qonaqlar üçün furşet təşkil olunmuşdur.

Aparıcı tədbirin təşkilatçıları barədə məlumat vermişdir. Bildirmişdir ki, “Nargis” jurnalı respublikamızda və ölkəmizin hüdudlarından kənarda moda və incəsənətə tam yeni baxışlı bələdçidir. Jurnal 368 səhifə həcmində və rüblük nəşr olunur. Bu nəşr oxuculara moda aləminin ən son meylləri, mövsüm yenilikləri, afişa, məqalə və incəsənət xəbərləri təqdim edir.

Qeyd edilmişdir ki, “28 Cinema” Enhanced 4K müasir texnologiyasına əsaslanan, Barco yeni nəslindən olan proyektorlar və 3D Xpand texnologiyalı eynəklər təqdim edir. “28 Cinema” “Platinum Movie Suites” zalı daxil olmaqla 6 zaldan ibarətdir və kinoteatrın ərazisində “Blackberry” restoranı və “Cappuccino coffee house” yerləşir.

Vurğulanmışdır ki, mərasimin platinum sponsoru “Qarant Sığorta” şirkəti, qızıl sponsorları “PAŞA Bank” və “Azeronline”, təşkilati dəstək verən “ASPI Winery & Vineyards” şirkətidir.

Tədbir çərçivəsində iştirakçılara yeni filmlə bağlı suallar verilmişdir. Qaliblərə məşhur “Montblanc” brendindən saat, “Qarant Sığorta” şirkətindən brilyant qələm və “Versace” butiki tərəfindən müxtəlif hədiyyələr təqdim olunmuşdur.

Sonra film nümayiş etdirilmişdir.  

Film Frensis Skot Fidceraldın eyniadlı məşhur romanı əsasında ekranlaşdırılmışdır. Rejissoru Baz Lurman olan filmdə rollarda Leonardo Di Kaprio, Tobi Maquayr, Keri Malliqan, Ayla Fişer, Ceyson Klark çəkilmişlər.

 Hadisələr XX əsrin 20-ci illərində Nyu-Yorkda cərəyan edir. Filmin baş qəhrəmanı heç kəsə məlum olmayan və sirli Qetsbidir. Bəziləri onun varlığına inanmır, bəziləri isə onun müharibə qəhrəmanı olduğunu deyir. Tezliklə Qetsbiyə gözəl qadın vurulur və o, anlayır ki, bu qadınsız yaşaya bilməz. Lakin onunla birgə olmaq üçün Qetsbi çox şey etməlidir. 

Tədbir çərçivəsində iştirakçılara “Nargis” jurnalı paylanılmışdır.

Premyera gecəsi after-party ilə davam etmişdir.

    AzərTAc