Azərbaycan Yazıçılar Birliyinin (AJB) “Natəvan” klubunda tanınmış yazıçı Solmaz Muxtarovanın “Son döyüşə gedən yol” kitabının təqdimat mərasimi olmuşdur. Tədbiri AJB-nin mətbuat xidmətinin rəhbəri Ədalət Əsgəroğlu açaraq S.Muxtarovanın həyat və yaradıcılığı haqqında qısa məlumat verərək yazıçının Vətənə, torpağa məhəbbət ruhunda qələmə alınmış əsərlərinin, o cümlədən yeni “Son döyüşə gedən yol” kitabında toplanmış yeni hekayə və povestlərin  oxucuların dərin marağına səbəb olduğunu bildirmişdir.

Mərasimdə çıxış edən şair və yazıçılar bu yaxınlarda 70 yaşı tamam olmuş yazıçının əsərlərinin bir sıra məziyyətləri barədə söz açmış, ona yeni yaradıcılıq uğurları və cansağlığı arzulamışlar.

Sonda Yazıçı S.Muxtarova çıxış edərək təqdimat mərasiminə toplaşanlara dərin minnətdarlığını bildirmiş, vətənpərvərik ruhunda bundan sonra da əzmlə yazıb-yaradacağını söyləmişdir.

“Xalq qəzeti”