Slovakiyanın "Eurovision-2012" mahnı müsabiqəsində təmsilçisi Max Jason Mai "Baku Crystal Hall"ın səhnəsində çıxışının mahiyyətini belə izah edir: "Maksimum səy + Maksimum şou + Maksimum performans".
AzərTAc eurovision.az saytına istinadla xəbər verir ki, özünü bütün Avropaya tanıda bilmək üçün "Eurovision" fürsətini yüksək qiymətləndirən Max Jason Mai müsabiqədə iştirak edə bilmək üçün bir çox fədakarlıqlar göstərməli olmuşdur.
Müğənni bununla bağlı demişdir: "RTVS" televiziyası ilə imzaladığım müqaviləyə əsasən, "Eurovision"da iştırakımla əlaqədar bütün xərclərimi özüm ödəməli idim. Bakıda peşəkar şərtlərlə mükəmməl mahnı və şou göstərə bilməkdən ötrü hər şeyi satdım. Slovakiya kimi kiçik bir ölkə üçün bu müsabiqədə qalib gəlmək necə də böyük şansdır! Hələ də buna can atıram. Slovakiyada bir çoxları mənim dəli olduğumu düşünür. Mən isə onlara fikir vermirəm. Əksinə bundan qürur duyur və uğur qazanacağıma inanıram..."
Max Jason Mai "Don't Close Your Eyes" adlı müsabiqə mahnısı ilə "Baku Crystal Hall"ın səhnəsinə mayın 24-də 15-ci çıxacaqdır.