Azərbaycanın zəngin mədəniyyəti vardır və onu dünyada tanıtmaq çox vacibdir. Bu sözləri Heydər Əliyev Fondunun dəstəyi və təşkilatçılığı ilə Fransanın San-Trope şəhərində II Ramatuel klassik musiqi festivalı çərçivəsində keçirilən "Azərbaycanın mədəni zənginlikləri" sərgisinin açılış mərasimində Ramatuel şəhərinin meri Rolan Bruno demişdir. 
Mer bildirmişdir ki, əvvəllər Azərbaycanı yalnız Mstislav Rostropoviçlə tanımışdır. Lakin Heydər Əliyev Fondunun və onun prezidenti, Azərbaycanın birinci xanımı Mehriban Əliyevanın misilsiz xidmətləri sayəsində bu ölkəyə daha yaxından bələd olmuş və onun mədəniyyətini sevmişdir. R.Bruno, həmçinin iyulun 17-də keçirilən II Ramatuel klassik musiqi festivalında azərbaycanlı ifaçıların da iştirak etmələrindən qürur duyduğunu vurğulamışdır.
Mer Heydər Əliyev Fondunun da dəstək verdiyi bu festivalın Azərbaycan musiqisinin dünyada dinlənilməsi baxımından əhəmiyyətini qeyd etmişdir. "Azərbaycan mədəniyyəti ilə bağlı tədbirlərin keçirilməsi əhəmiyyətlidir. Çünki sizin ölkənin çox zəngin mədəniyyəti vardır. Biz hamımız yaxşı bilirik ki, Şərqdə ilk opera məhz Azərbaycanda yaranmışdır. 2011-ci ildə isə Azərbaycan "Eurovision" mahnı müsabiqəsinin qalibi olmuşdur. Bütün bunlar Azərbaycan mədəniyyətinin zənginliyindən xəbər verir".

Aygün ƏLİYEVA AzərTAc-ın müxbiri
San-Trope