Muzeyin direktoru Sübhi Kəngərli demişdir ki, Naxçıvan Muxtar Respublikası Ali Məclisi sədrinin "Görkəmli dövlət xadimi və diplomat Behbudağa Şahtaxtinskinin 130 illik yubileyinin keçirilməsi haqqında" 2011-ci il 21 fevral tarixli sərəncamına əsasən, Azərbaycanın ictimai-siyasi həyatında, dövlətçilik tarixində özünəməxsus yeri və rolu olan Behbudağa Şahtaxtinskinin həyatı, siyasi və diplomatik fəaliyyəti ilə bağlı araşdırmalar aparılır, yeni tədqiqat materialları üzə çıxarılır. Bu tədbir də görkəmli dövlət xadiminin həyat və fəaliyyətinin daha yaxından öyrənilməsi məqsədi daşıyır. Behbudağa Şahtaxtinski Naxçıvanın muxtariyyət qazanmasında, dövlətçilik tarixində mühüm rol oynamış, 1921-ci ildə Moskva müqaviləsinin imzalanmasında tarixi xidmətlər göstərmiş, əsl vətənpərvər olmuşdur. 
Tədbir iştirakçıları "Behbudağa Şahtaxtinski - 130" guşəsinə baxmışlar. Guşədə Naxçıvan Muxtar Respublikası Ali Məclisi sədrinin sərəncamının mətni, görkəmli diplomatın tədqiqatçısı, tarix elmləri namizədi Fizuli İbrahimzadənin "Behbud Şahtaxtinski", "Behbudağa Şahtaxtinskinin həyatı və siyasi fəaliyyəti" kitabları, müxtəlif qəzet və jurnallarda görkəmli dövlət xadimi haqqında yazılar yer almışdır.

AzərTAc