Daşkənddəki Satira Teatrında Azərbaycanın dahi bəstəkarı Üzeyir Hacıbəylinin “Arşın mal alan” musiqili komediyasının özbək dilində təqdimatı olub. Təqdimatda Özbəkistanın ədəbiyyat, mədəniyyət və incəsənət xadimləri, diasporumuzun üzvləri, jurnalistlər iştirak ediblər.

 

Quruluşçu rejissoru Özbəkistanın Xalq artisti Bahadur Yuldaşev olan tamaşada əsas rolları Səncər Səttarov, Bekzad Şoymetov, Xuvayda Cumayeva və başqaları ifa ediblər. Musiqi tərtibatçısı isə Özbəkistanda tanınan saz ifaçısı, soydaşımız İlham Abdullayevdir. “Arşın mal alan” Özbəkistanda ilk dəfə 1919-cu ildə Daşkənddəki “Kolizey” teatrında tamaşaya qoyulub. Elə həmin il Bakıdan gələn rejissor Mirzə Həbib Axundzadə Səmərqənddə yaşayan azərbaycanlılardan ibarət teatr truppası yaradıb və əsər bu qədim şəhərdə səhnəyə qoyulub.

Bu əsər 1921-ci ildə Buxarada da oynanılıb. 1922-ci ildə isə Daşkəndin “Raxat bağçası” teatrında Sidqi Ruhullanın rəhbərliyi ilə Azərbaycandan gələn aktyorlar musiqili komediyaya səhnə həyatı veriblər. Sonrakı illərdə “Arşın mal alan” dəfələrlə Daşkənd, Fərqanə, Buxara, Kokand, Xarəzm, Səmərqənd şəhərlərində tamaşaçılara təqdim edilib.

Üzeyir Hacıbəylinin bu ölməz əsəri 100 ildən artıqdır ki, Orta Asiyada səhnədən düşmür. Teatrlar zaman-zaman bu əsərə müraciət edirlər. Bir neçə il əvvəl isə Daşkənddəki Operetta Teatrı “Arşın mal alan”ı rus dilində tamaşaya hazırlamışdı.

Qeyd edək ki, bu əsər ümumən 76 ölkənin 187 teatrında tamaşaya qoyulub. 1945-ci ildə çəkilmiş “Arşın mal alan” filmi isə 136 ölkədə nümayiş etdirilib.

M.MÜKƏRRƏMOĞLU,

 “Xalq qəzeti”