İyunun  24-dən iyulun  4-dək  Bəhreyn Krallığının Manama şəhərində UNESCO-nun Ümumdünya İrs Komitəsinin 42-ci sessiyası keçirilib. Bu barədə Xarici İşlər Nazirliyi və Mədəniyyət Nazirliyindən məlumat  verilib.

 

Məlumatda  deyilir ki, iclasda Azərbaycan Respublikasının mədəniyyət naziri Əbülfəs Qarayevin rəhbərliyi altında Xarici İşlər və Mədəniyyət nazirliklərinin əməkdaşlarından ibarət nümayəndə heyəti iştirak edib.

İclas çərçivəsində UNESCO-nun Ümumdünya Mədəni və Təbii İrsin qorunması haqqında Konvensiyasına aid məsələlər müzakirə edilib, eyni zamanda, müxtəlif ölkələrin maddi irs nümunələri Ümumdünya İrs Siyahısına daxil edilib.

İclasın  sonunda növbəti il üçün komitənin sədri və 43-cü sessiyaya ev sahibliyi edəcək ölkə ilə bağlı müzakirələr aparılıb.

Yekun qərara əsasən Azərbaycan Respublikasının mədəniyyət naziri Əbülfəs Qarayev  komitəyə sədr seçilib.

Beləliklə, 2019-cu ildə UNESCO-nun Ümumdünya İrs Komitəsinin 43-cü sessiyasına Azərbaycan ev sahibliyi edəcək. Tədbirdə dünyanın 180-dən artıq ölkəsindən 2000 nəfərdən çox nümayəndənin iştirakı gözlənilir.

Ümumdünya İrs Komitəsinin sessiyası dünya mədəni irsinə töhfə verən ən nüfuzlu tədbirlərdən hesab olunur. Ümumdünya İrs Komitəsi dünya xalqlarının kimliyini və tarixi yaddaşını ifadə edən maddi və təbii irs nümunələrinə, ən dəyərli abidələrə dair qərarlar qəbul edir. Bu tədbirə ev sahibliyi etməklə  Azərbaycan Respublikası dünya xalqlarının mədəniyyət tarixinə öz  töhfəsini verəcəkdir.

M.MÜKƏRRƏMOĞLU, 

“Xalq qəzeti”