Azərbaycan Bəstəkarlar İttifaqının Üzeyir Hacıbəyli adına konsert salonunda “Şuşanın sədaları” adlı konsert təşkil edilib. Tədbir Şuşa şəhər musiqi məktəbləri şagirdlərinin iştirakı ilə baş tutub. Konsert Azərbaycan Xalq Cümhuriyyətinin və Milli Ordumuzun yaranmasının 100 illiyinə həsr olunub. 

 

Azərbaycan Bəstəkarlar İttifaqının sədri, Xalq artisti Firəngiz Əlizadə çıxış edərək tədbirin əhəmiyyətindən söhbət açıb. Xalq artisti tədbir iştirakçılarına Qarabağ torpağının dilbər guşəsi olan Şuşanın füsunkar təbiəti və qədim mədəniyyəti haqqında danışıb. Şuşadan çıxmış istedadlı insanların mədəniyyətimizin inkişafında böyük töhfələr verdiyini diqqətə çatdırıb. F.Əlizadə bildirib ki, bu tarixi torpağımız 26 ildir yağı düşmən tapdağı altındadır. Amma Ali Baş Komandan İlham Əliyevin rəhbərliyi altında torpaqlarımız azad olunacaq və həmin gün uzaqda deyil. 

Şuşa Şəhər İcra Hakimiyyəti başçısının müavini Vüsalə Fətullayeva isə işğalçı Ermənistanın Azərbaycan xalqının başına gətirdiyi fəlakətlərdən bəhs edib. Bu gün işğal altında olan Şuşa şəhərinin bədnam düşmənlər tərəfindən viran edildiyindən, tarixi mədəniyyət abidələrinin dağıdıldığından danışıb. 

V.Fətullayeva gənc musiqiçilərə yaradılan şərait, onlara göstərilən qayğı üçün F.Əlizadəyə təşəkkürünü bildirib. Həmçinin üç dildə nəşr olunan “Qarabağ” kitabı bəstəkara təqdim edilib.

Sonda musiqi məktəbi şagirdlərinin ifası tədbirə əlavə rəng qatıb. 

Ü.VAHİDQIZI,

“Xalq qəzeti”